Peter Magyar şimbä könne Vengriyä xökümäte başlığı bularaq ant itte häm Viktor Orbannıñ 16 yıllıq xakimiyätenä noqta quydı.
Magyarnıñ üzäk-uñçı “Tisa” partiyäse ütkän aydağı saylawlarda Orbannıñ ütä uñçı “Fides” ittifağın ciñep, zur uñışqa ireşte.
“Tisa” partiyäse, 199 urınlı parlamentta öçtän ike küpçelekne yawlap, Orbannıñ xäkimiyäte waqıtında qabul itelgän möhim säyäsätlärne üzgärtü öçen citärlek deputat sanına ireşte.
Magyar xäzerge waqıtta 141 urınğa iyä bulğan partiyäseneñ deputatları belän bergä parlament binasına kerde. Orbannıñ “Fides-KDNP” ittifağınıñ parlamenttağı deputatları sanı 52gä töşte, ä ütä uñçı “Watan” xäräkäte altı urın yawladı.
Magyar Awrupa Berlege fondların qaytarırğa niyätli
199 deputat häm azçılıqlarnıñ 11 süzçese, sessiya waqıtında ant itü aldınnan, üz wäqalätlären räsmi räweştä täqdim itte.
Magyar yaña xökümätneñ iñ möhim östenlekläre korruptsiya belän köräş, xoquq östenlege häm korruptsiya şöbhäläre säbäple tuñdırılğan Awrupa Berlege fondların kire qaytaruı bulaçağın belderde.
Sessiya aldınnan yasağan belderüendä: “İñ möhim burıç — korruptsiyäne tuqtatu häm Awrupa Berlege fondlarınıñ kire qaytarıluın täêmin itü,” — dide.
Orbannıñ citäkçelege däwerendäge kiyerenkelektän soñ, Magyar xökümäteneñ Awrupa Berlege belän tağın da yaqınraq mönäsäbätlär qoruı kötelä.
Deputatlar sessiya waqıtında yaña parlament spikerın da sayladı. Bu wazıyfağa “Tisa” partiyäse namzäte Agnes Forstxoffer bilgelände.
