Ukraina tışqı êşlär ministrlığı Rusiyäneñ ilneñ törle töbäklärenä oyıştırğan höcümnärendä kim digändä 6 keşeneñ hälaq buluın, 20 keşeneñ yaralanuın belderde.
Ministrlıqnıñ comğa könne X platformasında yasağan belderüenä qarağanda, ilneñ kön’yaq-könçığışındağı Zaporojye ölkäsendä yağulıq salu stansiyäsendä yanğın çıqqan, infrastruktura zarar kürgän häm 2 keşe yaralanğan.
Xar’kov ölkäsendä hawa höcümnäre skladqa, toraq yortlarğa häm transport çaralarına zıyan kitergän. Alar arasında 4 bala da bulğan 10 keşe yaralanğan, 1 keşe hälaq bulğan.
İlneñ üzäk öleşendäge Dnepropetrovsk ölkäsendä höcümnär şäxsi toraqlarğa, poçta bülekçäsenä häm transport çaralarına zıyan kitergän.
Ministrlıq Pavlograd şähärendä 8 yäşlek qız balanıñ hälaq buluın, tağın 1 keşeneñ yaralanuın belderde.
Kön’yaqtağı Odessa ölkäsendä Rusiyä höcümnäre yağulıq tankerları häm gaz tankerında yanğınınarğa kitergän. 1 keşe hälaq bulğan, 4 keşe yaralanğan.
Yanğın sünderü êşläre qabatlanğan hawa höcüme kisätüläre arqasında totqarlanğan.
Donetsk ölkäseneñ könçığışındağı Kramatorsk şähärendä isä 3 keşe hälaq bulğan, kim digändä 6 keşe yaralanğan.
Ministrlıq “Rusiya tuqtarğa cıyınmıy” dip belderep, Ukrainanıñ partnyerların tağın da awır sankśiyälär kertergä häm hawa saqlanu sistemasın köçäytergä çaqırdı.
Şul uq waqıtta ike yaq ta töne buyı köçle pilotsız oçu apparatları aktivlığı küzätelüen xäbär itte.
Ukraina armiyäse 79 Rusiyä pilotsız oçu apparatın bärep töşerüen beldersä, Rusiyä saqlanu ministrlığı hawa saqlanu sistemalarınıñ 133 Ukraina pilotsız oçu apparatın totqarlawın citkerde.
