Ukrainanıñ töbäk wäqalätleläre Mäskäwneñ Ukrainanıñ berniçä zur şähärenä höcümnärendä tuğız keşeneñ hälaq buluın citkerde.
Kiyev xärbi idaräse başlığı Timur Tkaçenko “Telegram”dağı yazmasında: "Kiyevta 23 keşe, şul isäptän ber balanıñ, yaralanuı bilgele. Qızğanıçqa qarşı, ülüçelär sanı dürtkä citte", - dip belderde.
Êçke êşlär ministrı İgor Klimenko monnan alda Ukrainanıñ tön’yaq-könçığışındağı Xar'kov şähärendä "Ğadättän tış xällär xezmäteneñ biş qotqaruçısı yanğın sünderü operatsiyäläre waqıtında hälaq bulğan" dip beldergän ide.
Klimenko “Telegram”dağı yazmasında: "Şulay uq, kim digändä, biş keşe yaralandı", - dip östäde.
Kiyev soborı yanğınğa duçar buldı
Kiyev mêrı Vitaliy Kliçko düşämbe könne Kiyev-Peçersk Lavrası kebek mäşhür pravoslaviye kompleksındağı Märyäm Ananıñ Uspenziya soborı Rusiyä höcümnärennän soñ yanğınğa duçar buldı dip belderde.
Vitaliy Kliçko “Telegram”da bolay dip yazdı: "Kiyev-Peçersk Lavrası territoriyäsendä yanğın çıqtı. Märyäm ananıñ Uspenziya soborınıñ tübäse yana". Bu waqıtta Ukrainanıñ berniçä zur şähäre, şul isäptän, Kiyev höcüm astında ide
Ukrainanıñ keşesez hawa apparatları höcümnärendä Mäskäwdän yaqınça 200 çaqrım kön’yaqta urnaşqan Tula şähärendä öç keşe hälaq buldı, öç keşe yaralandı. Töbäk gubernatorı citkergänçä, yaralanuçılar arasında ber yaş'lek bala da bar.
