Räsmi zatlar belderüençä Tın Okeanda urnaşqan Kiribati cömhüriyätendä bu atnada 6 metr ozınlığındağı keçkenä köymädä öç ay buyı yözgän, alar arasında ike bala da bulğan biş keşe qotqarılğan.

Tağın dürt keşeneñ xäzerge waqıtta da yuğalğan buluı belderelgän.

Awstraliya teleradiokompaniyase “ABC” xäbärenä qarağanda Mikroneziya federativ ştatlarınnan könçığışqa taba yaqınça 5 meñ 400 çaqrımğa kitkän törkem düşämbe könne Kiribatiğa qarawçı Fanning utrawı yarlarında cirle xalıq tarafınnan qotqarılğan.

Guamda urnaşqan AQŞnıñ Yar buyın saqlaw xezmäte sişämbe könne yasağan belderüendä, tuğız keşe bulğan köymäneñ 30 iyül'dä Mikroneziyadäge Ruo utrawına qaytıp citmäwe säbäple yuğalğan dip xäbär itelüen rasladı.

Belderüdän kürengänçä 85 meñ 700 kvadrat çaqrımlıq mäydanda 10 kön däwamında alıp barılğan êzläw-qotqaru êşläre waqıtında yuğalğan köymä yäki anıñ êçendäge keşelärgä qarawçı bernindi dä êz tabılmağan.

AQŞnıñ Yar buyın saqlaw xezmäte “Associated Press” xäbär agentlığına cibärgän êlektron xatta: «Bu biş keşeneñ tabıluına häm xäzerge waqıtta qaraw astında bulularına ışanıp bulmıy, bu - bik yaxşı xäbär», – dide.

“Associated Press” agentlığınıñ yuğalğan dürt keşeneñ yazmışı turında AQŞnıñ Yar buyın saqlaw xezmätlärenä cibärgän sorawına älegä cawap kilmägän.