Törkiyä êlekke tışqı êşlär ministrı, xäzerge waqıtta Awrupa iminlek häm xezmättäşlek oyışması ğomum särqätibe wazifasın başqaruçı ilçe Färidun Sinirlioğlunı Berläşkän Millätlär Oyışması ğomum särqätibe öçen räsmi räweştä namzät itep kürsätte.

Törkiyäneñ BMOdağı daimi wäkile, ilçe Äxmät Yıldız “Anadolu” agentlığı xäbärçese belän ütkärgän äñgämäsendä namzätlek turındağı räsmi xatnı BMO ğomum şurası räislegenä tapşıruların belderde.

İlçe Yıldız tübändägelärne äytte: "İlbaşıbız Räcäp Täyyip Ärdoğan, ilçe Sinirlioğlunıñ BMO ğomum särqätibe wazifasın başqaru öçen kiräkle sıyfatların, sälätlären, xalıqara ölkädäge täcribäsen häm aña bulğan ışanıçın isäpkä alıp, anı namzät itep kürsätüne xupladı."

Äxmät Yıldız BMO ğomum särqätibe öçen köräştä älegä berdäm kandidat kürenmäw säbäple Törkiyäneñ BMO êşen ciñeläytü maqsatınnan Sinirlioğlunı namzät itep kürsätüen belderde, şul uq waqıtta, älege saylawda namzätneñ Latin Amerikası häm Karib töbägennän buluı turındağı ğädätkä dä xörmät kürsätülären, şunlıqtan bu könnärgä qädär kötep toruların assızıqladı.

İlçe Yıldız namzätlek turındağı möräcäğät xatında Färidun Sinirlioğlunıñ rezyumesı häm kiläçäk küzallawı turındağı dokumentı buluın östäde.

2015 yılnıñ avgust-noyabr aylarında tışqı êşlär ministrı, 2016-2023 yıllarda isä Törkiyäneñ BMOdağı daimi wäkile wazifaların başqarğan täcribäle törek diplomatı Färidun Sinirlioğlu xäzerge waqıtta Awrupa iminlek häm xezmättäşlek oyışmasınıñ ğomum särqätibe bulıp tora.