Fälästin çığanaqları mäğlümatlarına qarağanda, İzrail köçläre pänceşämbe könne basıp alınğan Yordannıñ könbatış üzänlegendä oyıştırğan basqınnar waqıtında kim digändä 13 fälästinlene saq astına alğan.

Fälästinle äsirlär media ofisı häm cirle çığanaqlar alar arasında öç bertuğannıñ da buluın belderde.

Çığanaqlar sälamätlek saqlaw xezmätkäre häm İzrailneñ kilep urnaşuçılarına qarşı aktivist Beşar äl-Karyutineñ dä saq astına alınuın xäbär itte.

Cirle çığanaqlarnıñ “Anadolu” agentlığına birgän mäğlümatına qarağanda, Xevron şähärendä İzrail köçläre cidençe kön rättän  basqınnar häm yabular oyıştırdı, İske şähär tiräsendäge timer qapqalarnı yapqan.

Basıp aluçı köçlär, şulay uq, Celda häm Ayn Deir Baha mäxällälärendäge fälästinlelärneñ yortların xärbi kazarma bularaq qullanu öçen tartıp alğan.

Xevron muniśipalitetı sişämbe könne yasağan belderüendä basqınnar näticäsendä yaqınça 5 meñ fälästinleneñ, yäğni 780 ğailäneñ üz yortların taşlap kitärgä mäcbür buluın citkerde.

Operatsiya comğa könne ike fälästinleneñ İzrailneñ ike xärbiyen üterüe häm tağın bersen yaralawına kitergän höcümnän soñ başlandı.

 Soñraq İzrail armiyäse ike fälästinlene üterde.

Fälästinle äsirlär cämğıyäteneñ belderüenä qarağanda, İzrail köçläre comğa belän çärşämbe könnäre arasında 110 fälästinlene saq astına alğan.

İzrail köçläre Salfit şähärendä ike fälästinleneñ yortın cimergän, Deir Ballut awılında isä cir mäydanın buldozer belän tigezlägän.

Cirle xakimiyät wäqalätlese Cihad Yassin “Anadolu” agentlığına yasağan belderüendä, İzrail köçläreneñ röxsätsez tözeleş alıp baru säbäbe belän suütkärgeçlärne dä buldozer belän cimerüen äytte. Anıñ farazlawınça, awılda yaqınça 100 cimerü boyırığı birelgän.