Rusiyä İranğa qarşı yaña xärbi höcümnär planlaştırıluı turındağı xäbärlär citdi borçılu tudıruın belderep, töbäktäge wäzğıyätne diplomatik yullar belän cayğa salırğa kiräklegen citkerde.
Tışqı êşlär ministrlığı süzçese Mariya Zaxarova İran tiräsendäge xäzerge wäzğıyät belän bäyle yazmaça belderü yasadı.
İrannıñ AQŞ häm İzrail tarafınnan säbäpsez agressiyağa duçar buluın äytkän Zaxarova töbäktäge bäreleşneñ äle haman çişeleşsez qaluın häm Yaqın Könçığıştağı başqa krizislar belän ürelüen añlattı.
Mariya Zaxarova: «İranğa qarşı yaña xärbi xäräkätlär planlaştırıluı turındağı işarälär bik citdi borçılu tudıra», – dide.
Soñğı aylardağı xärbi höcümnär İran xalqınıñ üz ileneñ möstäqillegen häm bäysezlegen yaqlaw ixtıyarın sındırıp bulmawın kürsätüen assızıqlağan Zaxarova yaña höcüm belän yanawçılarnıñ bu faktornı iskä alırğa tiyeşlegen belderde.
Töbäktäge wäzğıyätneñ cayğa salınu öçen diplomatik tırışlıqlarnı arttırırğa çaqırğan Zaxarova, Rusiyäneñ aradaşçılıq tırışlıqların yaqlawın häm söyläşülär barışına öleş kertü öçen äzer buluın äytte.
Mariya Zaxarova, Ormuz buğazındağı wäzğıyätneñ dä iñ qısqa waqıt êçendä normalläşüen kötülären assızıqlap, buğazğa yarı bulğan illärneñ häm älege möhim su yulın imin räweştä qullanırğa telägän däwlätlärneñ legal mänfäğätlären isäpkä alırğa kiräklegen belderde.
Rusiyä süzçese 26 oktyabr könne Tähranda İran belän «Mäkkä paktı» qatnaşuçıları arasında yuğarı däräcädä söyläşülär ütkärelüen dä xuplawların äytep, kürşe illär arasında konstruktiv dialog, üzara ışanıç häm iminlek mänfäğätlärenä xörmät kürsätüneñ ähämiyätenä basım yasadı.
Zaxarova şulay uq Rusiyäneñ Farsı qultığında tıştan qatışulardan bäysez, urtaq iminlek sisteması buldıru yaqlı buluın bilgeläp ütte.
