Nepalnıñ Êverest töbägendäge Soluxumbu rayonında ike boralaq, maxsus mäydançıqqa töşep utırğanda, bäreleşä. Näticädä ber keşeneñ ülüe xäbär itelä.

Politsiyä “AFP” agentlığına ber çit il watandaşınıñ ülüen, tağın ber keşeneñ yaralanuın rasladı.

Soluxumbu cirlege politsiyäse başlığı Nabin Raja Budhatoki “AFP” agentlığına: "Çit il watandaşı waqıyğa urınında ülgän, ä tağın ber yaralanğan keşe xastaxanägä ozatılğan", - dip belderde.

Gimalay ilendä keçkenä boralaqlar turistlarnı, alpinistlarnı häm törle materiallarnı taşu, şulay uq, ğadättän tış xällärdä êvakuatsiyäläw öçen kiñ qullanıla. Qatlawlı geografiyä häm tiz üzgärüçän hawa şartları aviatsiyä êşçänlegen, ayıruça, xätär qıla.

Dönyadağı iñ biyek 14 tawnıñ sigeze, şul isäptän, Êverest tawı urnaşqan Nepal yıl sayın meñlägän çit il alpinistları häm cäyäwleläreneñ marşrutına kerä.