AQŞ ilbaşı Donald Tramp İran belän suğışnıñ tizdän tämamlanaçağın häm neft bäyäläreneñ töşäçägen äytte, İrannıñ "kiläçäktä atom-töş qoralına iyä bulmayaçağın" täêmin itärgä teläwlären belderde.

İlbaşı Tramp bu süzlärne Oval kabinetında İran mäs'äläsenä bağışlanğan matbuğat konferensiyäsendä söyläde.

3 noyabrdä uzaçaq ara kongress saylawları aldınnan yağulıq bäyäläreneñ yuğarı buluına zarlanğan saylawçılar turında sorağan xäbärçegä cawap itep, Tramp: "Minem başqa çaram yuq ide. İran belän suğış tizdän tämamlanaçaq, ul tämamlanu belän neft bäyäläre kisken töşäçäk", - dide.

AQŞ ilbaşı yuğarı neft bäyäläreneñ çınlıqta İrannıñ atom-töş qoralına iyä bulmawın täêmin itü öçen "tülärgä kiräk bulğan keçkenä bäyä" buluın äytte.

Donald Tramp, İrandağı êşläre äle betmäwen häm suğışnıñ tulısınça tämamlanmawın añlatıp, bolay dide: "Bez xäzer ük annan çigenä alır idek, läkin bu minem öçen citärlek tügel. Bez monıñ (atom qoralınıñ) biş, altı, un yıldan soñ bulmawın täêmin itärgä tiyeşbez, häm ul bulaçaq".