Awrupa Berlegeneñ (AB) buınnar arasındağı ğadellek, yäşlär, mädäniyät häm sport buyınça komissarı Glenn Mikallef Fransiyäneñ Strasburg şähärendä uzğan Awrupa Parlamentınıñ plenar utırışında "Balalarnıñ iminlegen häm psixik sälamätlegen sotsial media tudırğan qurqınıçlardan saqlaw" temasına çığış yasadı.

Êkrannarda artıq küp waqıt ütkärü häm sotsial media qullanu borçılu öçen säbäp bulıp baruın assızıqlap, Mikallef: "Bolar - Awrupada bez oçraşqan yäşlärneñ psixik sälamätlege krizısınıñ töp säbäpläreneñ berse", - dide.

Ul, balalarğa üz yäşlärenä turı kilmägän kontentqa kerü mömkinlege birgän oçraqta, barı tik ölkännär öçen genä kontent bulğan platformalar cawaplılıqqa tartılırğa tiyeşlegen assızıqladı, censi yaqtan açıq kontentlı dürt sayt turındağı başlanğıç näticälärgä iğtibar itte. Alarnı xäzer tikşerälär.

Mikallef: "Älbättä, bu platformalarnıñ xäzer üzlären yaqlaw mömkinlege häm xoquqı bar, läkin Komissiyäneñ qaraşları raslansa, bez Awrupa Berlege qağıydälären ütämäw turında qarar qabul itä alabız", - dide.

"Çın irek - balanıñ yanawlarğa duçar bulmıyça möstäqıyl üsüe."

Utırışta çığış yasaganda, Awrupa Parlamentındağı ikençe zur törkem bulğan Sotsialistlar häm Demokratlar (S&D) vitse-prezidentı Aleks Agius Saliba sotsial medianı artıq küp qullanu balalarnıñ üseşenä tiskäre yoğıntı yasiy dip bellerde häm: "Bu êpidemiä. Aşığıç çaralar kürergä kiräk", - dide.

Parlamenttağı "Awrupanı yañartu" törkeme räise Valeri Xayer, şulay uq, balalarnıñ sotsial medianı qullanu arqasında "qurqınıç astında" buluın bilgeläp ütte.