Yäkşämbe könne çıqqan xäbärlärdä İrannıñ Ormuz buğazın açu häm suğışnı tuqtatu, şul uq waqıtta, atom programması buyınça söyläşülärne soñraq êtapqa küçerü täqdime yasawı turında äytelä.
“Axios” säxifäse citkergänçä, bu täqdim İrannıñ atom-töş programması buyınça diplomatik tırışlıqlar näticä birmägännän soñ AQŞqa aradaşçılar, şul isäptän, Paqıstan aşa citkerelgän.
Bu mäs'älä belän tanış çığanaqlar plannıñ, uran bayıtu buyınça fiker qarşılıqların çitkä quyıp, blokadanı beterügä häm diñgez transportın (asqormasın) torğızuğa qarawçı tizräk kileşügä yünältelüen belderä.
Täqdimdä utnı tuqtatunıñ ozaytılacağı yaki daimi bulaçağı, atom programması buyınça söyläşülärneñ buğaz yañadan açılğannan häm çikläwlär beterelgännän soñ ğına başlanacağı kürsätelgän.
AQŞ wäqalätlese häm söyläşülär belän tanış çığanaqlar Aq Yortnıñ täqdimne aluın, läkin anı qabu itäçäge turında bernindi dä kürsätmä birmäwen äytte.
AQŞ İlbaşı Donald Tramp düşämbe könne milli qurqınıçsızlıqnıñ yuğarı wazıyfalı wäqalätleläre belän xäzerge qarşılıq häm mömkin bulğan çişeleşlär turında fiker alışu öçen oçraşu ütkäräçäk dip kötelä.
Tramp Tähranğa basımnı arttıru öçen İran portlarınıñ diñgez blokadasın saqlap qaluın östen kürüen äytte.
"Ägär dä sezdä küp külämdä neft’ bulsa, ütkärgeç yabılsa, ul torba êçtän şartlıy", - dide Tramp, İrannıñ êçke basımğa duçar bulu öçen "yaqınça öç kön" genä waqıtı barlığın östäde.
Yal könnärendä diplomatik tırışlıqlar köçäyde; İran tışqı êşlär ministrı Abbas Araqçi buğaz mäs'äläse buyınça İslamabadta (Paqıstan) häm Maskatta (Oman) söyläşülär ütkärde.
Düşämbe irtäsendä Araqçi Rusiyä İlbaşı Vladimir Putin häm başqa yuğarı däräcädäge wäqalätlelär belän söyläşü öçen Sankt-Peterburgqa kilde.
Aq Yort wäkile Olivia Wayls: "Bu neçkä diplomatik söyläşülär. Kartalar AQŞ qulında", - dide.
İran häm AQŞ 11-12 apreldä İslamabadta söyläşülär ütkärde, läkin konfliktnı tuqtatu turında kileşügä ireşä almadılar.
Yaña söyläşülär turında tırışlıqlar däwam itsä dä, töp qarşılıqlar arasında Ormuz buğazı, AQŞnıñ İran portların qamawı häm İrannıñ urannı bayıtu xoquqı bar.
