Fälästin mediası xäbärlärenä qarağanda yäkşämbe könne yaqınça 150 İzrail basıp aluçısı poliśiya saqlawı astında, yaw astındağı Könçığış Qodüstä urnaşqan “Äl-Aqsa” mäçetenä basqın yasağan.
“Wafa” räsmi xäbär agentlığı Qodüs gubernatorlığına tayanıp basıp aluçılarnıñ bu urınğa Mağribi qapqasınnan kerülären häm “Äl-Aqsa” mäçete işeğalında qotqı saluçı turlar yasawların belderde.
Qodüs mäs’älälärenä yünältelgän “Al-Qastal” saytı yazuınça basqın waqıtında alar Talmud ritualların (dini yolalar) başqarğannar.
İzrail poliśiyase mäçetkä kerüne çiklär öçen däwam itüçe çaralar qısasında fälästinlelärneñ kerüen tıydı.
“Äl-Aqsa” mäçete — möselmannar öçen dönyanıñ öçençe iñ izge urını. Yähüdlar isä bu töbäkne "Ğibadätxanä tawı" dip atıylar häm borınğı zamannarda monda ike yähüd ğibadätxanäse bulgan dilär.
2003 yıldan birle İzrail poliśiyase comğa häm şimbä könnärennän tış, basıp aluçılarğa irtän häm töştän soñ, könenä ike tapqır mäçetkä ber yaqlı kerü röxsäte birä.
Mäçetne küzätüçe Qodüs İslâmi waqıflar mödirlege bu basqınnarnı tuqtatunı qat-qat taläp itte, läkin İzrail xakimiyäte moña qolaq salmadı.
2022 yılnıñ axırında Itamar Ben-Gvir İzrail Milli İminlek ministrı bulğannan birle, mäçettäge xoquq bozular arttı.
Fälästinlelär İzrailneñ yaw astındağı Könçığış Qodüsne, ayırıça “Äl-Aqsa” mäçeten yähüdiläşterü tırışlıqların köçäytüen häm töbäkneñ ğaräp häm İslâm tanıqlığın sörtergä tırışuın äytä.
Fälästin xalqı 1967 yılğı İzrail okkupaśiyäsen yäki 1980 yılğı anneksiyäsen tanımawçı xalıqara qararlar nigezendä Könçığış Qodüsne üzläreneñ kiläçäk däwlätläreneñ başqalası itep kürä.
