İran ilbaşı Mäsud Päzäşkiyan düşämbe könne yasağan belderüendä suğışnıñ berkemneñ mänfäğätendä tügellegen äytep, kiyerenkelekne kimetü öçen "barlıq ratsional’ häm diplomatik yulnı" qullanırğa çaqırdı.

İrannıñ däwlät xäbär agentlığı IRNA citkergänçä, Päzäşkiyan: "Yanawlarğa qarşı torğanda, kiyerenkelekne kimetü öçen här törle ratsional’ häm diplomatik yul qullanılırğa tiyeş. Şul uq waqıtta, doşmanğa ışanmaw häm bäyläneşlärdä saqlıq kürsätü — bäxässez şartlar", — dide.

Şulay uq, İran tışqı êşlär ministrlığı süzçese İsmail Bäkayi İrannıñ AQŞ belän yaña söyläşülär uzdıru planı bulmawın äytte.

Süzçe İsmail Bäkayi ilneñ yarım räsmi "Tasnim" xäbär agentlığı bastırğan belderüdä: "İran, milli mänfäğatlären saqlaw öçen bernindi soñğı möddätne yaki ultimatumnı qabul itmi. Milli mänfäğatlärne saqlaw, moña kiräk bulğan qadär waqıt däwam itäçäk häm AQŞ yaki İzrail rejimı yaña avantürist adım yasasa, xärbi köçlär tulı köçenä häm täwäkkällek belän cawap biräçäk", — dip östäde.

Bu belderülär, aradaşçılıq protsessı turında mäğlümatı bulğan ike Paqıstan çığanağınıñ "Anadolu agentlığı”na İran delegatsiyäseneñ AQŞ belän ikençe tur söyläşülärdä qatnaşaçağın äytüennän soñ yasaldı.

Tähran häm Vaşington berençe tur söyläşülären Paqıstannıñ başqalası İslamabadta ütkärde häm bu söyläşülär 12 apreldä kileşügä ireşmiçä tögällände.