Düşämbe kiçendä Yaponiyädä bulğan 7,4 ballı cir teträwdän soñ, ilneñ tönyaq häm tönyaq-könçığış öleşlärendä tsunami dulqınnarı küzätelde.
AQŞ Geologik tikşerenüläre mäğlümatları buyınça, GMT buyınça 07:52 säğat’tä terkälgän cir teträwneñ üzäge İvate prefekturasındağı Miyako şähärennän yaqınça 114 kilometr yıraqlıqta bulğan.
Yaponiyä xökümäte zilziläneñ zurlığın 7,5 ball dip terkäde häm Xokkaydo, Aomori häm İvate prefekturalarında Tın okean yarı buyınça tsunami turında iskärtü birde.
Xökümät belderüendä: "Yar buyında yaki yılğa tiräsendä yaşäwçelär tiz arada biyegräk häm qurqınıçsızraq urınnarğa êvakuatsiyälänergä tiyeş", — dip äytelgän.
"Kyodo News" xäbär itüençä, Tın okeandağı İvate häm Aomori prefekturaları yarlarında tsunami dulqınnarı küzätelgän.
Räsmi zatlar tsunaminıñ öç metrğa qadär biyeklekkä citüe turında iskärtte. Aomori häm Miyagi prefekturalarındağı atom êlektr stantsiyälärendä "bernindi anomaliyälär terkälmägän" diyelde.
Cir teträwdän soñ başqala Tokio häm Aomori prefekturası arasında tizyöreşle poyızdlar yöreşe tuqtatıldı.
Xökümät räise Sanaê Takaiçi zıyan kürgän rayonnarda yaşäwçe xalıqnı tsunami bulu ixtimalı bulğan oçraqta "biyegräk urınnarğa menärgä" çaqırdı.
Cir teträw näticäsendä bernindi zıyan da terkälmägän.
