Törkiyä ilbaşı Räcäp Tayyip Ärdoğan, räsmi säfär belän başqala Änkarağa kilgän Livan däwlät başlığı Djozef Aun belän İlbaşı rezidenśiyasendä küreşep söyläşkännän soñ oyıştırılğan matbuğat oçraşuında belderü yasadı.
Ärdoğan Livannıñ inde küptännän töbäktäge qayber köçlärneñ köndäşlek häm bäreleş mäydanı bularaq iñ zur zıyan kürgän qardäş il buluına işaräläp, Yaqın Könçığışta iñ başınnan birle maqsat itep quyılğan totırıqlılıq, tınıçlıq häm xezmättäşlek moxitınnan iñ küp fayda küräçäk illärneñ başında Livannıñ buluın äytte.
İzrailneñ Livanğa höcümnäre başlanğan 2026 yılnıñ 2 martınnan birle 4 meñ 300dän artıq livanlınıñ ğomere özelüen, 2 meñnän artıq livanlınıñ yaralanuın, 1 million keşeneñ öylären, tuğan cirlären taşlap kitärgä mäcbür itelüen assızıqlağan Ärdoğan tübändägeçä däwam itte:
"Biredä tağın ber qat xörmätle ilbaşınıñ häm Livan xalqınıñ qayğısın urtaqlaşam, yaralanuçılarnıñ tizräk sawığuın telim. Törkiyä iñ berençe könnän birle höcümnärgä iñ köçle reakśiya kürsätkän illärneñ berse buldı. İzrailneñ keşelekkä qarşı cinayätlären bu barışta kön tärtibendä tottıq. Bu höcüm häm yawlawnıñ tuqtawı öçen başlanğan diplomatik iniśiativalarnı yaqınnan küzätäbez. İzrail höcümnärendä zur zıyan kürgän Könyaq Livannı yañadan torğızu öçen ilebezneñ qulınnan kilgän yärdämne kürsätergä äzer buluın belderäsem kilä."
Livan ilbaşı Djozef Aun isä Törkiyä belän Livan arasında nıqlı mönäsäbätlär buluın belderep: "İke il xalqı mänfäğatläre häm töbäk totrıqlılığı öçen xezmättäşlek itärgä teläk bar," — dide.
Ärdoğanğa cılı qarşı alu, qunaqçıllıq häm çaqıru öçen räxmät äytkän qunaq däwlät başlığı, säfäreneñ möhim çorda tormışqa aşuına basım yasap, töbäkneñ xäzer anıñ kiläçäge sürätlänä torğan urınğa äylängänen belderde
Aun, Törkiyä-Livan qardäşlegeneñ bik möhim buluın häm aldağı çorda bu kiläçäkne tözü mäsä'läsendä zur rol' uynawın citkerep: "Xörmätle Ärdoğan, çınlap ta üzeneñ küzallawı häm tuğrı ixtıyarı belän bu mönäsäbätlärne yaqlıy häm bu mönäsäbätlärne yaña xezmättäşlek däräcäsenä citkerüdä täwäkkäl," — dide.
