Tışqı êşlär ministrı Xaqan Fidan, Qatar säfäre waqıtında «Qatar TV» kanalına interv’yu birde.
Qatar belän Törkiäneñ tarixi häm köçle mönäsäbätlärgä iyä ike il buluına iğtibarnı cälep itkän Fidan, ike il arasındagı strategik partnerlıknıñ nigeze märxüm Qatar Ämire, şäyex Xämäd bint Xälifä Äl Tani çorında salınğanın bilgeläp ütte.
Xaqan Fidan: «Bez bügen Livannan Äfğanstanğa, Äfğanstannan Sudanğa, Sudannan Ğazzägä, Fälästin mäs’äläsenä häm İran mäs’äläsenä qädär Törkiä-Qatar xezmättäşlege kürsätkän güzäl ürnäkneñ başqalar tarafınnan da xäzer töbäktä yuğarı bäyälänüen küräbez. Çınlıqta, töbäktä köndäşlek urınına, härwaqıt ätkänebezçä, konstruktiv xezmättäşlekkä ixtıyac bar. Qatar da monıñ öçen bik citdi tırışlıq kürsätä», — dide.
Farsı qultığı töbägendä, ayıruça Qatardan başlap, Soğud Ğäräbstanı, Berläşkän Ğäräp Ämirlekläre, Küväyt häm Omannıñ yıllar buyı bik citdi alğarışka ireşüenä iğtibar itkän ministr Fidan, bu illärneñ üseş häm töp xezmätlärne yaxşırtu aşa dönya standartlarında bik köçle däwlätlär häm şähärlär tözüen belderde.
Xaqan Fidan 28 fevraldän bügengä qadär däwam itüçe AQŞ-İran suğışınıñ töbäk iqtisadına täêsir itüen citkerep, bu suğışnıñ cäyelü qurqınıçınıñ töbäktä tağın da kübräk problemalarğa kiterü mömkinlegen assızıqladı.
Xäzerge waqıtta infrastrukturalarğa höcümnär buluın xäterlätkän Fidan: “İran häm Amerika arasında kileşü yañadan tözelsen dip telibez. Belüebezçä, Paqıstan aradaşçılığı belän, Qatarnıñ aktiv öleş kertüe belän, Törkiyäneñ dä yärdäme belän kileşü berketmäse tözälgän ide. Läkin soñınnan monnan yıraqlaştıq. Yañadan bu kileşügä qaytırğa kiräk», — dide.
Tışqı êşlär ministrı, Qatarğa säfäre waqıtında ütkärgän oçraşularında bu mäs’älälärne söyläşülärenä tuqtalıp, bolay dip äytte:
«Şunı qanäğätlek belän küräm, Qatar qabat bu krizisnı çişü öçen böten konstruktiv texnikalarnı, barlıq kanallarnı qullanıp qulınnan kilgänne başqarırğa tırışa. İnşallah, bügenge könnärdä yaxşı xäbär alırbız. Törkiä dä bu mäs’älädä Qatar belän tığız koordinaśiyadä. Qatar iminlege dä, Qatar tınıçlığı da, töbäk iminlege dä, töbäk totrıqlılığı da Törkiyäneñ dä mänfäğätendä. Şul räweşle, Farsı qultığı töbäge belän dä, başqa İslam dönyası illäre belän dä küp kenä mäs’älädä bulğanı kebek, bu mäs’älädä dä bergä êşlärgä däwam itäçäkbez.»
