Törkiyä İlbaşı Räcäp Tayyip Ärdoğan, başqala Änkarada oyıştırılğan 2026 NATO sammitınıñ “uñışlı” tögällänüen belderep, yuğarı däräcäle oçraşunı Awrupa-Atlantik töbägendä iminlek problemaları kübäygän çorda ittifaq kiläçägeneñ şäkellänüenä öleş kertäçäk “tarixi” cıyılış bularaq bäyäläde.
Ärdoğan sammittan soñ oyıştırğan matbuğat oçraşuında: “Törkiyädä 22 yıl aradan soñ ikençe, başqala Änkarada isä bez berençe tapqır oyıştırğan 36nçı NATO Däwlät häm xökümät başlıqları sammitın uñışlı tämamladıq”, - dip äytte.
Ärdoğan cıyılışnıñ Awrupa-Atlantik iminlege cähätennän kritik çorda uzuın häm ittifaq öçen daimi ähämiyätkä iyä bulaçağın belderde.
Däwlät başlığı: “Awrupa-Atlantik qurqınıçsızlığı sınalğan şuşı çorda bez qabul itkän bu tarixi sammit urtaq kiläçägebezgä yünäleş biräçäk üzençälektä ütkärelde”, - dide.
F-35 mäs’äläsendä optimizm
Ärdoğan AQŞlı wazıyfadaşı Donald Trampnıñ Törkiyägä F-35 xärbi oçqıçlarınıñ tapşırıluı mäs’äläsendä “uñay qaraş” kürsätüen belderep, Amerika Quşma Ştatlarınıñ Änkarağa qarata sankśiyäläreneñ zur külämdä ğamäldän çığarıluın da iskärtep uzdı.
İlbaşı Änkaranıñ nihayät bişençe buın xärbi oçqıçların aluı mäs’äläsendä ömetle buluın belderde.
Ärdoğan: “F-35 mäs’äläsendä dä xörmätle Tramp nigezdä Törkiyägä qarata uñay totışta. İnşallah, “F-35”lär Törkiyägä tapşırılğan mizgeldä dä böten dönya “Amerika birgän wäğdäsen ütäde” dip äytäçäk”, - dide.
Ärdoğan, Trampnıñ Törkiyäneñ cirle “KAAN” xärbi oçqıçı öçen F110 reaktiv motorlarınıñ satıluın xuplawın da iskärtep uzıp: “Bu motorlar belän bäyle mäs’äläne min xörmätle Tramp belän moñarçı söyläştem. Üzläre uñay qaraş belderde. İnşallah, problema bulmayaçaq”, - dip äytte.
Tramp citäkçelegeneñ 700 million dollardan kübräk bäyädäge kileşü qısalarında Törkiyägä distälägän reaktiv motornı satu täqdimen kiläse êtapqa küçerü niyäten yaqın waqıtta Kongressqa citkerüe belderelde.
Global tınıçlıq qısaları
İlbaşı Ärdoğan, Ukraina häm Yaqın Könçığıştağı suğışlarnı beterü öçen diplomatik tırışularnı qabat başlatırğa çaqırıp, töbäkneñ artıq bäreleşlärgä çıdıy almayaçağın belderde.
Ukrainadağı suğışqa tuqtalıp uzuçı Ärdoğan bäreleşlärneñ bişençe yılına kergänen häm zur yuğaltularğa kitergän cimergeç suğışqa äylängänen äytte.
Ärdoğan: “Ğadel tınıçlıqnıñ ciñelüçese bulmıy. Taraflarnı Törkiyädä qabat oçraştırırğa äzer buluıbıznı qabat äytäm”, - dide.
Monnan tış “Ğazzädä yaw häm zolım tuqtamıy däwam itä”, - dip äytüçe Ärdoğan İzrailneñ Ğazzädä qılğan genośidın gäyepläde.
Regional iminlek mäs’äläsenä dä tuqtalıp uzuçı İlbaşı Törkiyäneñ Ormuz buğazındağı totrıqlılıqnı saqlawğa yärdäm itüdäge täwäkkällegen däwam itüen belderde.
“Bez quldan kilgänneñ barısın da êşlibez”, - dip äytüçe Ärdoğan Ormuz buğazınıñ suğış mäydanına äylänüenä yul quymawnıñ zarurlığına basım yasadı.
