Ukraina İlbaşı Volodimir Zelenskiy Rusiyäneñ ber subyektı bulğan Başqortstan cömhüriyäte başqalası Ufadağı neft êşkärtü obyektına tağın ber höcüm yasawların citkerde.

Volodimir Zelenskiy sotsial media aşa Rusiyädä qayber obyektlarğa höcümnär oyıştırıluın belderde.

Ufa neft êşkärtü obyektına yañadan höcüm turında mäğlümat belän urtaqlaşıp, Zelenskiy anıñ front sızığınnan yaqınça 1300 kilometr yıraqlıqta urnaşuın citkerde.

Zelenskiy, şulay uq, Rusiyäneñ Penza ölkäsändäge, Ukrainadan yaqınça 600 kilometr yıraqlıqtağı, raketa komponentları citeşterelä torğan obyektqa höcüm itülären belderde.

Rusiyäneñ tınıçlıqnı täêmin itärgä tiyeşlegenä basım yasap, Zelenskiy: "Rusiyä bu suğışnı tuqtatırğa tiyeş", - dide.

Zelenskiy, şulay uq, Rusiyädäge obyektlarğa höcümnär kürsätelgän dip farazlanuçı kadrlar belän urtaqlaştı.

Ukraina armiyäse moña qadär Ufadağı neft êşkärtü obyektına höcüm itkän ide.

İkençe yaqtan, Ukraina hawa köçläreneñ yazma belderüenä qarağanda, Rusiyä armiyäse kiçä tönlä ilgä 2 raketa häm 153 qorallı keşesez hawa apparatı belän höcüm başlağan.

Belderüdä Ukraina hawa köçläreneñ ber raketa häm 130 dronnı täêsirsez xälgä kiterüe äytelä.

Ukraina ğadättän tış xällär xezmäte üzeneñ sotsial çeltärlärdäge akkauntında Dnepropetrovsk ölkäsendä Rusiyä höcümnäre näticäsendä ber keşeneñ ülüe häm öç keşeneñ yaralanuı turında xäbär itte.