AQŞ däwlät särqatibe Marko Rubio Vaşington häm Tähran arasındağı söyläşülär tuqtap qalğannan soñ, İran delegatsiyäsenä, şul isäptän, tışqı êşlär ministrı Abbas Araqçığa, ildän kiçekmästän kitärgä boyırğan dip farazlana.

AQŞ räsmie, “Axios” yañalıqlar platformasına birgän intervyusında, Aq Yortnıñ 28 sentyabr düşämbe ırtäsendä kön däwamında İran belän söyläşülärdä alğa kiteş bulırğa mömkinlegen bäyäläsä dä, soñraq söyläşülärneñ alğa barmawı turında näticä yasawın belderde.

Şunnan soñ, Rubio kürsätmäse buyınça, Berläşkän Millätlär Oyışması ğomum şurasında qatnaşu öçen ildä bulğan Araqçı häm anıñ delegatsiyäsenä şul kiçne ük Nyu-Yorktan kitärgä quşılğan dip äytelä.

Berniçä säğattän soñ İran delegatsiyäse aêroportqa barıp, Qatar başqalası Doxağa kitüçe oçqıçqa utırğan dip äytelä.

Rubionıñ "sabırlığı bette"

İke AQŞ räsmiye, “Associated Press” (AP) agentlığına üz isemnären atamaw şartı belän söylägänçä, Araqçınıñ başta 30 sentyabrgä qadär Nyu-Yorkta qaluı planlaştırılğan bulğan.

Räsmilär xäbär itüençä, bu çorda Araqçınıñ AQŞ belän Ormuz buğazın açu, suğışnı tuqtatu häm İrannıñ atom programmaları buyınça söyläşülärne yañadan başlaw maqsatınnan turıdan-turı bulmağan söyläşülär ütkärüe kötelgän.

Räsmilär yal könnärendä Qatar aradaşçıları qatnaşında söyläşülärdä çiklängän alğarışqa ireşelüen, Rubionıñ "sabırlığı betüen" häm İran delegatsiyäseneñ kiçekmästän kitüen taläp itüen citkerä.

İran bu süzlärne kire qağa

İrannıñ BMOdağı daimi wäkilleğe “X” sotsial media akkauntı aşa bu xaqta belderü yasadı.

Belderüdä delegatsiyäneñ AQŞ tarafınnan Nyu-Yorktan kitärgä mäcbür itelüe turındağı süzlär kire qağıldı, alarnıñ düşämbe kiçendä, AQŞ Däwlät departamentına aldan xäbär itelgän grafik nigezendä ildän kitüe bilgeläp ütelde.