Franśiya däwlät başlığı Êmmanuêl Makron häm xäläl cefete Bridjit Makron ike könlek räsmi säfär belän İspaniya başqalası Madridka kilde.

Êmmanuêl Makron säfär qısalarında berençe itep şähär üzägendäge patşa sarayında 6nçı Felipe patşa belän oçraştı.

İspaniya patşası soñınnan Makron xörmätenä Sarsuêla sarayında töşke aş mäclese oyıştırdı.

Franśiya liderı irtägä premyer-ministr Pedro Sançes belän küreşäçäk, iqtisad forumında, şulay uq yäşlär häm sośial media temalı cıyılışlarda qatnaşaçaq.

Makronnıñ İspaniyağa säfärendä ike il arasında sanlı tarmaq, ênergiya xezmättäşlege, yalğış mäğlümat belän köräş, urtaq awıl xucalığı häm balıqçılıq säyäsätläre, şulay uq diñgez yulı belän narkobizneska qarşı köräş ölkälärendä 10nan artıq kileşü berketmäseneñ imzalanuı kötelä.

Sançes häm Makron 2023tä Barselonadağı ike yaqlı oçraşuda imzalağan İspaniya-Franśiya duslıq kileşüe dä Makron säfäre uñayınnan Senatda raslanaçak.

Bu kileşü ike il arasında migraśiya häm energetika mäs’äläläre belän ber rättän ike yaqlı xezmättäşleklärne arttırunı küzdä tota.

İqtisadi yaqtan Franśiya İspaniya êksportında berençe urında tora; İspaniya xökümäte mäğlümatlarına kürä towarlar belän säwdä itü küläme 90 milliard yevrodan artıq.

Germaniya häm Qıtaydan soñ Franśiya - İspaniyaneñ iñ zur kliyentı häm öçençe zur täêmin itüçese bulıp tora.