Könbatış Qodüstä oyıştırılğan çarada çığış yasağan İśxak Gerśog İzrail cämğıyatendä qotoçqıç wäxşilek taraluın assızıqladı.
Gerśog fanatik yähüdlärneñ möselman häm xristian fälästinlelärneñ izge urınnarına höcüm itüen, basıp alınğan Yordannıñ könbatış üzänlegendä Fälästin cirlären tartıp alğan İzrail bandaları höcümnäreneñ qurqınıç däräcädä artuın bilgeläp ütte.
Älege wäxşilekneñ çittän üzäkkä taba tamır cäyä başlawın äytkän Gerśog: “İzrail cämğıyäteneñ qırıy mäxällälärendä qotoçqıç yırtqıçlanu prośessı bara. Qulğa alınğan häm soraw alınğan keşelärneñ bernindi xoquqları yuq dip sanağan berniçä keşeneñ wäxşileklärenä duçar bulabız,”-dide.
Gerśognıñ süzlärenä Gazzä blokadasın özü häm gumanitar yärdäm citkerü öçen yulğa çıqqan, İzrail tarafınnan xalıqara sularda qanunsız räweştä totqarlanğan Global’ Sumud flotiliyäse aktivistlarına qarata naçar möğalämäne maqtap, videoların urtaqlaşqan İzrailneñ çiktän tış uñçı milli qurqınıçsızlıq ministrı İtamar Ben-Gvir reakśiya belderde.
Ben-Gvir X akkauntındağı yazmasında:“İzrail däwläteneñ yözlärçä meñ watandaşın canwar, yırtqıç dip atawçı ilbaşı däwlät başlığı wazıyfasına layıq tügel”,- dip belderde.
Sumud flotiliyäse aktivistlarına qarata naçar möğalämäne yaqlağan çiktän tış uñçı ministr İzrail törmälärenä barıp, fälästinle totqınnarğa qarata naçar möğalämäne açıqtan -açıq faş itüe häm fälästinle äsirlärgä qarata naçar mönäsäbätne xuplawı belän bilgele.
Keşe xoquqların yaqlaw oyışmaları Ben-Gvir ministr bulğan çorda İzrail törmälärendä Fälästin totqınnarına qarata sistemalı intekterep cäfalawnıñ artuın häm şartlarnıñ naçarayuın belderä.
