Ğazzägä taba baruçı Global Sumud flotiliyäsendä bulğan häm İzrail tarafınnan totqarlanğan 87 aktivıst, bu xälgä protest belderep häm İzrail törmälärendäge Fälästin totqınnarına teläktäşlek yözennän, açlıq iğlan itte.

Flotiliyä sişämbe könne “X” platformasındağı yazmasında yänäse "iñ äxlaqlı armiya" dip atalğan İzrail armiyäseneñ öç atna êçendä ikençe tapqır xalıqara sulardan iptäşlären urlawı turında xäbär itte.

Flotiliyä "qanunsız urlawlarğa qarşı protest häm İzrail törmälärendä totıluçı 9500dän artıq Fälästin totqınnarına teläktäşlek belderep, kim digändä, 87 aktivıstnıñ irekkä cibärelgänçe açlıq iğlan itäçägen" citkerde.

Flotiliyä İzrail xäkimiyätläre totqarlağan barlıq totqınnarnı azat itüne täläp itte häm xökümätlärne bu "pirat ğamälen" xökem itärgä çaqırdı.

Flotiliyä, monnan tış ​​Ğazzä blokadasın beterüne häm barlıq Fälästin totqınnarın, şulay uq, ​​flotiliyädän urlanğan barlıq keşelärneirekkä cibärüne täläp itte.

Global flotiliyä sişämbe könne yardäm kolonnasındağı barlıq 50 korabnıñ da İzrail tarafınnan qulğa alınuın citkerde.

Korablarda 44 ildän 428 keşe, şul isäptän, 78 Törkiyä watandaşı bulğan.

İzrail Tışqı êşlär ministrlığı “X” säxifäsendäge yazmada barlıq aktivıstlarnıñ da İzrail korablarına küçerelüen häm İzrailgä yul totuların, anda kilü belän konsullıq wäkilläre belän oçraşa aluların xäbär itte.

Flotiliyä pänceşämbe könne Törkiyäneñ Marmaris şähärennän 2007 yıldan birle ğamäldä bulğan Ğazzä sızığın qanunsız qamawnı özü öçen yulğa çıqqan ide.

Bu flotiliyä belän bäyle berençe waqıyğa tügel. Aprel axırında İzrail xärbiläre Krit yanındağı xalıqara sularda tağın ber flotiliyädäge köymälärgä höcüm itte. Ul waqıtta korabta 39 ildän 345 qatnaşuçı, şul isäptän, Törkiyä watandaşları da bar ide.

İzrail 2007 yıldan birle Ğazzä sızığın qatı qamawğa aldı, bu 2,4 million keşene açlıq çigenä citkerde.

2023 yılnıñ oktyabrendä isä İzrail xärbiläre Ğazzägä qarşı genotsid suğışı başladı, 72 000nän artıq keşe üterelde, 172 000nän artıq keşe yaralandı.