Tramp, Nyu-Yorkta ütkärelüçe BMOnıñ 81nçe Ğomum şurasında qatnaşıp, çığış yasadı.
Çığışınıñ başında ozaq itep amerikan êçke säyäsätenä häm iqtisadına qağılışlı bäyäläwlär yasawçı Tramp yaqınayıp kilüçe Kongress ara saylaw aldınnan üz saylawçılarına yullamalar citkerde.
AQŞ İlbaşı bularaq bügengä çaqlı 8 suğışnı beterüen yaqlawçı Tramp Rusiyä-Ukraina suğışı, İran belän suğış, Ğazzädäge humanitar krizis häm başqa töbäklärdäge bäreleşlärneñ çişeleşe mäs’äläsendä bik zur tırışlıq sarıf itülären belderde.
Tramp fikerençä, İran belän kileşü 3nçe noyabr saylawınnan soñ bulaçaq
İran mäs’äläsendä kübesençä üzeneñ êlekkege yullamaların qabatlawçı Tramp: "(3nçe noyabrdäge) Saylawdan soñ şunda uq (İran belän) kileşügä ireşäçägebezgä ışanam, çönki alarnıñ monı yasamawı mantiqlı tügel”, - dip bäyäläw yasadı.
İrannıñ üzeneñ saylawdan nindi näticä belän çığaçağın kötüen alğa sörüçe Tramp saylawğa üzeneñ kermäwen, barı tik “Cömhüriyätçe” partiyäneñ yarışaçağın äytte.
AQŞ İlbaşı İran belän kileşü tözü yäki İrannı "yuq itü" mäs’äläsendä qarar qabul itü êtabında buluına basım yasadı.
İran belän bulğan krizisnıñ “niçek kenä bulmasın” xäl itelüeneñ zarurlığın iskärtep uzuçı Tramp bu êşneñ “tiz” räweştä çişelüeneñ kiräklegenä iğtibarnı yünältte.
"Ğazzägä milliardlağan dollar yärdäm kürsäteläçäk"
Tramp Törkiyäneñ Ğazzä öçen kertkän öleşenä tuqtalıp uzdı häm cıyılğan aqçanıñ waqıtı citkändä Ğazzäneñ torğızıluı öçen qullanılaçağın, illärneñ bik yumart xäräkät itüen äytte:
"Ğazzä tınıçlıq şurasına äğza illärneñ yärdäm êşçänlegenä kertkän milliardlağan dollar öleş öçen räxmätlebez. Bu aqçalar turıdan-turı Ğazzäneñ tözekländerelüenä häm yärdäm êşlärenä kitä. Marokko, Baxreyn, Qatar, Quveyt, Paqıstan, Soğud Ğäräbstanı, Törkiyä häm başqa küp illär üz öleşlären kertte. Bu illär bik yumart buldılar".
Wazıyfağa kereşüennän birle sigez suğışnı beterü belän ğorurlanuına basım yasawçı Tramp kilgän aqçalarnıñ ixtıyac bulğan urınnarğa kitüen, keşelärneñ humanitar yärdämneñ döres kürsätelüen teläwen häm milliardlağan dollar yärdämneñ Ğazzägä kitäçägen belderde.
"Rusiyä-Ukraina mäs’äläsen xäl itäçäkbez"
AQŞ İlbaşı Tramp, Rusiyä-Ukraina suğışınıñ beterelüe ölkäsendä dä bik tırışuların häm suğışnıñ tuqtawın teläwlären belderep: "Rusiyä häm Ukraina liderları belän bik yaqın xezmättäşlek êçendä bez häm bu mäs’äläne xäl itäçäkbez”, - dip äytte.
