Rusiyäneñ Amur ölkäsendäge Amur gaz-ximiya kompleksı tözeleş mäydançığında çıqqan yanğın näticäsendä cide keşe hälaq buldı, tuğız keşe yuğaldı.
Kompleksnıñ matbuğat relizında kiçä obyektta bulğan yanğın turında mäğlümat birelde.
Belderüdä êzläw-qotqaru operatsiyäläre barışında tağın dürt Qıtay watandaşınıñ mäyete tabıluı xäbär itelä, şunıñ belän yanğında ülüçelärneñ ğomumi sanı cidegä citte: ber Rusiyä watandaşı häm altı Qıtay watandaşı.
Podryatçı kompaniyädä êşläwçe tuğız Qıtay watandaşınıñ yazmışı älegä bilgesez, êzläw-qotqaru êşläre däwam itä.
Xäbär itelgänçä, waqıyğadan soñ 152 keşe meditsina yärdäme sorağan, 36 keşe törle däräcädäge cäräxätlär belän xastaxanägä salınğan.
Belderüdä tözeleş mäydançığındağı yanğın sünderelüe, häm töbäktäge toraq punktlar hawasındağı zararlı matdälär däräcäse artmawı äytelä.
Rusiyäneñ “Sibur” häm Qıtaynıñ “Sinopek” kompaniyäläre tarafınnan tözelgän “Amur gaz-ximiya kompleksı” dönyadağı iñ zur polimer häm gaz-ximiya citeşterü qorılmalarınıñ berse bulır dip kötelä.
