Aq Yort düşämbe kiçendä "Tramp TV" dip atalğan onlayn translyatsiya kanalın êşlätep cibärde. Kanalnıñ "täwlek äylänäse real waqıt rejimında yañartılıp toruçı videolar, möhim iğlannar häm kürelergä tiyeşle mizgellär" kürsätäçäge äytelde.
Kanal tapşıruların başlağanda Trampnıñ 3 iyüldä Raşmor tawında yasağan çığışınıñ arxiv kadrların kürsätä ide.
AQŞnıñ zur telekanalları “NBC”, “ABC”, “CBS” häm “Fox News”, şulay uq “CNN”, “Politico” häm “MS Now” kiçä xäbärçelärneñ ilbaşı brifinglarına kertelmäwenä protest yözennän Aq Yorttağı televideniye translyatsiyälären tuqtatırğa karar qıldı.
Öç çitläşterelgän media oyışması kiçä Vaşingtondağı federal apellyatsiya mäxkämäsendä Aq Yortqa kerü xoquqların torgızu öçen däğwa belderde.
Şimbä könne, AQŞ ilbaşı Donald Tramp kürsätmäse buyınça, Aq Yort qurqınıçsızlığı xezmätkärläre öç yañalıqlar oyışması jurnalistlarına binağa kerüne tıydı.
AQŞ ilbaşı Donald Tramp üzeneñ şäxsi platformasındağı xäbärendä bu qararın iğlan itep, älege mäğlümat çaralarınıñ "yalğan yañalıqlarnı daimi taratu näticäsendä" çitläşterelüen belderde.
