Kuba tışqı êşlär ministrı Bruno Rodriges AQŞnı iq’tisadi çaralar aşa ilenä basımnı köçäytüdä ğayepläde.

Rodriges sişämbe könne X platformasında yasağan belderüendä bolay dide: “AQŞ xökümäte Kubağa qarşı xärbi operaśiya başqaru turında işarälär yasarğa däwam itä. Monıñ ikeyözle yağı şunda: AQŞ distä yıllar buyı iq’tisadi suğış alıp barıp ilne cimerergä tırıştı häm bu xökümätneñ soñğı ike ayda genośid sıyfatındağı ike ilbaşı qararnamäsen qabul itep, monı tağın da zurraq tırışlıq belän däwam itüe”,- dide.

Rodriges iq’tisadi çikläwlärneñ dä, barlıq ixtimal xärbi operaśiyäneñ da xalıqara xoquqnı bozaçağın belderep, alarnı xalıqara cinayät’lär dip atadı.

Ul bolay dip östäde: “İq’tisadi blokada da, ênergiya qamalışı da, şulay uq çik ar’yağı mäcbüri çaralar, xärbi höcüm yanawı häm agressivlıq ğamäle üze dä xalıqara cinayät’lär.”

AQŞ däwlät särqatibe Marko Rubio isä sişämbe könne Vaşingtonnıñ Kubağa neft’ satqan teläsä qaysı ilgä tamğaxanä salımı kertü turındağı yanawlarına qaramastan, AQŞnıñ Kubağa neft’ blokadası kertmäwen äytte.

Rubio Aq Yortta jurnalistlar belän söyläşkändä bolay dide: “Kubağa qarşı neft’ blokadası yuq”.

Ul Kubadağı status-kvonıñ  qabul itelmäslek bulın, AQŞnıñ bu problemanı qarayaçağın, läkin monıñ bügen ük bulmayaçağın äytte.