AQŞ ilbaşı Donal'd Tramp İrannıñ soñğı utnı tuqtatu täq’dimennän qanäğat’ bulmawın häm Tährannıñ qabul itep bulmıy torğan taläplär quyuın belderde.
“Alar döres kileşüne tabarga tiyeş. Min älegä qanäğat tügel,” dip äytte Tramp comğa könne Aq Yorttan kitär aldınnan jurnalistlarğa.
Ni öçen qanäğat’ tügel dip sorağaç,Tramp: “Alar min qabul itä almıy torğan närsälär taläp itä”,- dip cawap birde.
“Alar barısı da kileşü tözergä teli, läkin barısı da bik butalçıq”,-dip östäde ul.
Tramp söyläşülärneñ Paqıstan qatnaşında däwam itüen äytep, İslamabadtağı räsmi zatlarnı Vaşington belän xezmättäşlek itüläre öçen maqtadı, läkin bu yul bik оzın dip kisätte.
Tramp bombağa totu kampaniyäsen yañadan başlamawnı östen kürä.
İlbaşı şulay uq suğışnıñ tämamlanuı global’ ênergiya bazarları belän bäyle buluın belderde, xäzerge waqıtta Ormuz buğazı yanında tuqtap torğan neft’ taşu tizdän üzgärergä mömkin dip äytte.
“Suğış tämamlanğaç, benzin bäyäläre êlekkege däräcälärennän tübän töşäçäk”,- dide.
AQŞ häm İzrail 28 fevral’dä İranğa höcüm başladılar; bu Tährannıñ İzrailgä häm AQŞ ob’yektları urnaşqan Farsı qultığı illärenä qarşı cawap birüenä häm Ormuz buğazın yabuına kiterde.
Paqıstan aradaşçılığı belän 8 aprel’dä ike atnalıq utnı tuqtatu iğ’lan itelde; annan soñ 11 aprel’dä İslamabadta turıdan-turı söyläşülär ütkärelde, läkin daimi utnı tuqtatu turında kileşügä ireşelmäde.
AQŞ ilbaşı Donal’d Tramp Paqıstannıñ üteneçe belän, yaña waqıt bilgelämiçä, utnı tuqtatunı ozayttı.
