Könbatış Yava provinśiyäseneñ Bekasi şähärendä ike poyezd bäreleşü näticäsendä ülüçelär sanı 14kä, ä yaralanuçılar sanı 84kä citkän.

 Däwlät mediası sişämbe könne, räsmi zatlarğa sıltama belän, anı soñğı yıllarnıñ iñ ülemçel timer yul qazalarınnan berse buluın xäbär itte.

“Antara” xäbär agentlığı mäğ’lümatlarına qarağanda, qaza düşämbe kiçendä Könçığış Bekasi stanśiyäsendä ber şähärtirä poyezd yıraq arağa yörüçe poyezd belän bäreleşü näticäsendä barlıqqa kilgän.

Däwlät timer yul şirkäte “PT Kereta Api Indonesia” (KAI) wäqalätleläre distälägän yaralanğan yulçınıñ törle xastaxanälärdä däwalanuın belderde.

“Jakarta Globe” xäbär itüençä, KAI süzçese Franoto Wibowo waqıyğanıñ Bekasidağı Bulak Kapal timer yul kiçüendä taksi êlekrlı şähärtirä poyezd belän bäreleşüdän başlanuın äytte.

Bäreleşüdän soñ şähärtirä poyezd rel’slarda tuqtap qalğan häm küp tä ütmiçä şul uq liniyädä ozın arağa yörüçe poyezd tuqtap qalğan şähärtirä poyezdına bärelgän.

Milli êzläw häm qotqaru agentlığı, şulay uq başqa aşığıç yärdäm törkemnäre tön buyı waqıyğa urınında êşlägän.

Räsmi zatlar hälaq buluçılarnıñ şäxesen açıqlaw öçen poliśiya xastaxanäsenä kiterelüen belderde.

Räsmi zatlar qorbannarnıñ barlıq mediśina häm cirläw çığımnarınıñ qaplanaçağın, ğailälärgä yärdäm itü öçen aşığıç yärdäm üzäge häm mäğ’lümat noqtaları buldırıluın xäbär itte.

Waqıyğa bulğan töbäktä poyezdlar xezmäte öleşçä tuqtatılğan.  

İndoneziya transport wäqalätleläre cimereklärne çistartu häm qotqaru operaśiyäläreneñ däwam itüen belderde.