Tennessi ştatında ülem cäzası kötelgän berdänber xatın-qız 50 yäşlek Krista Payk ülem cäzasın başqaru öçen yasalğan ike ülemçel inyeksiyädän dä isän qalğan.
Anıñ advokatları çärşämbe könne kiç ülem cäzasın başqarunı tuqtatu öçen federal mäxkämägä möräcäğat itkändä, Payknıñ pänceşämbe könne Grinviç waqıtı belän 1:26 säğattä "äle dä isän buluın häm ğırlawın" belderde. “NBC News” xäbär itüençä, advokatlar mäxkümneñ añın yuğaltuwın häm yöräk tibeşe däwam itüen citkerä.
Payknıñ yuridik törkeme soñraq anıñ yaqındağı xastaxanägä alıp kitelüen, läkin ni xäldä buluı älegä açıq tügellegen xäbär itte.
Advokatlar yazmaça belderüdä: "Tennessi ştatı bügen kiç qanunğa turı kilüçe ülem cäzasın qabat başqarıp çığa almadı", dide häm bolay dip östäde: "Krista xäzerge waqıtta yaqındağı xastaxanädä däwalana. Bezgä anıñ xäle turında älegä xäbär itelmäde".
Payknıñ ülem cäzasın Riverbendtağı törmädä başqaru planlaştırılğan. Ägär ul barıp çıqsa, Payk soñğı 200 yıl êçendä Tennessi ştatında ülem cäzası tormışqa aşırılğan berençe xatın-qız bulır ide.
Jurnalistlar da ülemgä kiterüçe inyeksıya yasalğan waqıtta törmädä bulğan şahitlar arasında ide.
Yuğarı mäxkämä, şulay uq, sişämbe könne cäzanı kiçektürü turındağı möräcäğatne kire qaqqan. Payqnıñ advokatları anıñ köç qullanu, qarawçısız qalu häm çensi zolım, şul isäptän, ike tapqır köçlänü oçrağın da kertep, awır balaçaq kiçerüen terkägän. Alar, şulay uq, törrmädä aña quyılğan bipolyar bozılu häm PTSD (travmadan soñğı stress bozıluı) diagnozlarına iğtibar yünältep, yarlıqaw sorıy.
Ni öçen ülem cäzası?
Paykka 18 yäş bulğanda, ul häm anıñ yörgän yegete Tadaril Şipp problemalı yäşüsmerlär öçen hönäri äzerlek lagerında tanışqan 19 yäşlek Kollin Slemmer isemle qıznı qıynaqannar, ğazaplağannar häm ütergännär. Üterü şaw-şaw quptara: qorbannıñ kükrägenä şaytan yolası simvolı bulğan pentagramma uyıp yasalğan.
Payk Kollinnıñ üzen mısqıllawın häm yegeten urlarğa mataşuın äytä. Soñraq lagerdağı tağın ike keşe Payknıñ üterü turında ul qılınğançı da, annan soñ da maqtanıp söyläwen häm alarğa qorbannıñ baş söyägeneñ ber kisägen kürsätüen raslıy.
Ber yıldan soñ ul ülem cäzasına xökem itelgän, ä 17 yäşlek Şipp şartlı räweştä irekkä çığu mömkinlege belän - gömerlek törmägä.
AQŞta 1976 yıldan birle ülem cäzasına tartılğan 1683 cinayätçeneñ nibarı 18e genä xatın-qızlar.
