Törkiyäneñ turizm şähäre Antaliya aprel' ayında tağın ber tapqır global' diplomatiyä üzägenä äylänäçäk, çönki dönya liderları, ministrlar häm yuğarı däräcädäge türälär xalıqara kalendardagı iñ möhim forumnarnıñ bersenä cıyıla.
"İrtägäne proyektlaw, bilgesezlekne idarä itü" teması astında uzaçaq Antaliya diplomatiyä forumı-2026 global' totrıqsızlık problemaların xäl itü häm xalıqara diplomatiyäneñ kiläçägen formalaştıru öçen liderlarnı berläşterä.
Bişençe Antaliya diplomatiyä forumı 17-19 aprel' könnärendä uza.
2021 yılda êşli başlağannan birle, forum dialog, xezmättäşlek häm yuğarı däräcädäge diplomatik êlemtälär öçen dönyadağı äydäp baruçı platformalarnıñ bersenä äylände.
Bıylğı forumda 150dän artıq ildän wäkillär, şul isäptän, däwlät başlıqları, ministrlar häm xalıqara oyışmalarnıñ yuğarı däräcädäge türäläre qatnaşaçaq dip kötela.
Törkiyä Tışqı êşlär ministrlığı çığanaqları buyınça, forumda 20dän artıq däwlät başlığı, 15 vitse-prezident häm 50dän artıq tışqı eşlär ministrı qatnaşır dip kötela.
Forumda 460tan artıq yuğarı däräcädäge qatnaşuçı, şul isäptän, xalıqara oyışmalardan yaqınça 75 wäkil häm yaqınça 5000 qunaq cıyılır dip kötela.
Çığanaqlar buyınça, “Antaliya diplomatiyä forumı-2026” kiñ geografik wäkillekkä iyä bulaçaq. Qatnaşuçı däwlät başlıqlarınıñ yaqınça yartısı Afrika häm Awrupadan kiläçäk.
Tışqı êşlär ministrları arasında qatnaşuçılarnıñ 40% - Afrikadan, 35% Awrupadan häm 22% Aziyädän bulaçaq.
Distälärçä utırış global' mäs'älälärne qarayaçaq
Programmada global' transformatsiya, bilgesezlek häm üzgärüçe töbäk balanslarına bağışlanğan 40tan artıq utırış häm liderlar panelläre bulaçaq.
Fiker alışular, şulay uq, üzgärüçe global' tärtipne formalaştıruçı säyäsi, iqtisadi, êkologik häm texnologik problemalarnı da qarayaçaq.
Quşımta çaralarda Balkan tınıçlıq platforması, Ğazzä, törki däwlätlär häm Törkiyä, Paqıstan, Soğud Ğaräbstanı häm Misır qatnaşında dürtyaqlı oçraşu şikelle temalar yaqtırtılaçaq.
