Törkiyä Tışqı êşlär ministrı Xaqan Fidan “Xamas” säyäsi byuro räise bulıp saylanğan Xälil äl-Hayyäne häm yanındağı “Xamas” wäkillegen qabul itte.

Tışqı êşlär ministrlığı çığanaqlarınnan alınğan mäğlümatkä kürä, Fidan yaña saylanğan wazıyfasında Hayyägä uñışlar teläde.

Hayyä isä Ğazzä häm Yordannıñ könbatış üzänlegendäge wazğiyät turında mäğlümat birde, İzrail Başministrı Binyamin Netanyaxu xökümäteneñ qanunsız toraq urınnar êşçänlegen häm Qodüstä izge urınnarğa qarşı höcümnären arttıruına iğtibarnı yünältte.

“Xamas”nıñ tınıçlıq söyläşülärendä konstruktiv totışın däwam itterüen belderüçe Hayyä fälästinlelär arasında tatulaşıp kileşü barışı turında da mäğlümat birde.

Ministr Fidan da Törkiyäneñ fälästinlelärneñ xaqlı däğwasın här ölkädä häm här platformada iñ köçle räweştä yaqlawın qabat bilgeläp uzdı.

Fidan Törkiyäneñ Netanyaxu xökümäteneñ Ğazzädä häm Yordannıñ könbatış üzänlegendä qılğan cinayätläreneñ häm izge urınnarğa qarşı höcümnäreneñ xalıqara cämäğätçelekneñ kön tärtibendä qaluın täêmin itüen häm Ğazzägä tağın da kübräk humanitar yärdäm citkerelüe öçen härtörle tırışlıqnı kürsätergä däwam itäçägen iskärtep uzdı.

Ministr Fidan Törkiyäneñ Ğazzä tınıçlıq barışın yaqlarğa däwam itäçägen, bu barışta “Xamas”nıñ uynağan rolen yuğarı bäyäläwen belderde.

Söyläşü waqıtında başqa regional mäs’älälär dä quzğatıldı.