“AirAsia” Kanadada yasalğan 150 “Airbus A220-300” oçqıçın satıp alu öçen 19 milliard dollarlık kileşü imzaladı. Arzan bäyäle xezmätlär kürsätüçe hawa yulı şirkäte “AirAsia” pänceşämbe könne yasağan açıqlawında, kiläçäktäge ixtıyaclarnı qanäğätländerü öçen bu zakaznı ike tapqır arttıra aluların da östäde.
“Airbus”nıñ Kanadanıñ Mirabel qalasındağı qorılmasında iğlan itelgän bu kileşü, Malayziya tarixındağı iñ zur zakazı bulıp tora. “AirAsia” şirkätenä nigez saluçılarınıñ berse bulğan Toni Fernandes, kileşüne “kiläse üseş öçen iskitkeç basqıç” dip atadı häm bolay dide: “Bu zakaz bezneñ ozın möddätle disśiplinabıznı häm maqsatlarıbıznıñ zurlığın kürsätä.”
Könyaq-könçığış Aziyanıñ iñ zur häm arzan bäyäle hawa yulı şirkäte bulğan “AirAsia” kileşüneñ kiläçäktäge ixtıyaclarnı qanäğätländerü öçen zakaz sanın 300gä qadar arttıru strategik sığılmalılığına iyä buluın belderde.
“Airbus”nıñ Kommerśiya oçqıçları başlığı Lars Vagner “A220” oçqıçlarınıñ Aziyadä êlek mömkin bulmağan yaña marşrutlar açacağı turında äytte.
Vagner yaña flotnıñ 2028nçe yılda tapşırıluı belän zurraq oçqıçlarnıñ Tönyäq Amerika, Awstraliya häm Awrupadağı ozın ara marşrutlarına yünälä alaçağın belderde.
Tantanada qatnaşqan Kanada prem’yer-ministrı Mark Karni bolay dide: “150 oçqıç Kanada fabrikalarında Kanada êşçeläre tarafınnan yasalaçaq. Meñnärçä injener, êlektrik, êretep yabıştıruçı häm informatika belgeçe öçen bu - iskitkeç oçqıçlar tözü digän süz. Bu alar öçen yuğarı xezmät xaqı bulğan, qızıqlı êş bulaçaq.”
Kanada Awrupadan tış zur “Airbus” programmaları çınğa aşqan il bulıp tora.
