Rusiyä ilbaşı Vladimir Putin “Rusiyä ğaskäriläre böten NATO tarafınnan qorallandırılğan häm yärdäm kürsätelgän “agressiv köç” belän bäreleşä,” dip äytte.
Putin, şimbä könne Qızıl mäydanda İkençe Bötendönya suğışında Sovetlarnıñ ciñüe uñayınnan oyıştırılğan Ciñü bäyräme paradında çığış yasap, bolay dide : “Ciñü yawlawçı buın bügenge maxsus xärbi operatsiyä wazıyfaların ütäwçe ğaskärilärgä ilham birä”.
Putin Rusiyä ğalimnäre häm injenerlarınıñ “zamança suğışı täcribäsennän faydalanıp” modern qorallar citeşterüen häm seriyäle citeşterüne kiñäytüen belderde.
Paradta Rusiyäneñ “maxsus xärbi operatsiyäsendä” qatnaşuçı xezmätkärlär, yuğarı xärbi uqu yortları studentları häm Rusiyä Qoralı Köçläreneñ törle bülekläre belän berrättän, Tönyaq Koreya armiyäse ğaskäriläre dä qatnaştı.
İskä alu çaraları aldınnan, Rusiyä saqlanu ministrlığı düşämbe könne 8-9 maydağı Ciñü bäyräme tantanaları öçen ike könlek utnı tuqtatu täqdim itte, bäyrämnär özelgän oçraqta Ukrainağa “zur külämle” raketa höcüme belän yanadı.
Ukraina şul uq könne cawap bularaq sişämbe tön urtasınnan başlap beryaqlı utnı tuqtatu iğlan itäçägen citkerde. Läkin soñraq ike yaq ta ber-bersen utnı tuqtatunı bozuda ğayepläde.
“Älegä konkret berni yuq”
Däwlät xäbär agentlığı “TASS” Kreml’ wäkile Dmitriy Peskovnıñ şimbä könne Mäskäwdäge Ciñü bäyräme tantanaların bozu öçen bernindi omtılış yasalmawın äytüen citkerde.
Peskov Ukraina belän utnı tuqtatunı 11 maydan soñraq ta ozaytu ixtimalı turında älegä fiker alışılmawın äytte. Putin häm Tramp arasındagı bäyläneşlärgä tuqtap, Peskov xäzerge waqıtta yaña oçraşu planlaştırılmawın belderde.
Trampnıñ Ukraina tınıçlıq söyläşüläre öçen Mäskäwgä AQŞ delegatsiyäse cibärelergä mömkin digän açıqlawlarına qarata ul, Rusiyäneñ mondıy delegatsiyäne qabul itärgä äzer buluın äytte. Peskov: “Älegä konkret berni yuq, läkin täbigıy ki, Rusiyä härwaqıt moña äzer”, – dide.
AQŞ ilbaşı Donald Tramp comğa könne “Truth Social” sotsial’ çeltärendä Rusiyä häm Ukrainanıñ utnı tuqtatu häm ike yaqtan da 1000är äsir almaşu turında kileşüen äytep, Putinğa da, Ukraina liderı Volodimir Zelenskiyğa da räxmät belderde.
Tramp: “Ömet itäm, bu – bik ozın, ülemçel häm awır suğış axırınıñ başlanğıçı bulır. İkençe Bötendönya suğışınnan soñğı iñ zur bäreleşne tuqtatu öçen söyläşülär däwam itä häm här uzğan kön sayın maqsatqa beraz yaqınaya bırabız”, – dip östäde.
