Törkiyä ilbaşı Räcäp Täyyip Ärdoğan İstanbulda uzğan “Törkiyä yasalma intellekt sammitı”nda möhim belderülär yasadı.
Ärdoğan cämäğatçelekkä 2026–2030 yıllarnı üz êçenä alğan "Törkiyä yasalma intellekt ğämäl planı"n täqdim itte.
“Bezneñ yasalma intellekt täqdim itkän mömkinleklärdän faydalanıp, Törkiyä ğasırında böyek häm köçle Törkiyäne sanlı ölkädä dä alğa cibärü qararıbız qatğıy”,- dip belderde Törkiyä ilbaşı.
Ul plannıñ tanı, qullan, citeşter häm idarä it digän dürt töp yünäleşkä nigezlänüen äytte.
Plan qısalarında ike yıl êçendä 5 million grajdanga yasalma intellekt gramotalılığı kursları bireläçäk, 10 meñ yuğarı däräcäle belgeç äzerlänäçäk häm milli mäğlümat kitapxanäse aşa däwlät mäğlümat cıyılmalarına kerü mömkinlege bulaçaq.
Monnan tış, 2030 yılğa qadär mäğlümat üzäge quäte kim digändä 1 gigavattqa citkereläçäk.
Ärdoğan süzlärençä, yasalma intellekt infrastrukturası öçen kim digändä 10 milliard dollar külämendäge investitsiyä cälep iteläçäk häm Törki däwlätlär oyışması belän urtaq räweştä “Törki tellärneñ böyek tel modele” êşlänäçäk.
“Bez Törkiyä yasalma intellekt ğamäl planı belän cälep itäçäk resurslardan barlıqqa kilgän östämä qıymmät 1 trillion liradan artır dip kötäbez. İnşalla, Törkiyäne yasalma intellekt çorınıñ aldınğı illäre arasına kertü öçen êşläyäçäkbez. Törkiyä ğasırın sanlı citeşterü ğasırı itäçäkbez”,- dide ilbaşı Räcäp Tayyip Ärdoğan.
