Ber tikşerenü kürsätkänçä, AQŞ, Tramp idaräse waqıtında imzalanğan kileşülär nigezendä, 25 000nän artıq keşene bernindi bäyläneşe bulmağan illärgä deportatsiyälägän.
Parijda urnaşqan "Tıyılğan xikäyälär" oyışması ütkärgän tikşerü näticäläre buyınça, 31 avgustqa qadär 28 ilgä, kimendä, 25 447 keşe cibärelgän. AQŞ xökümäte bu sannarnı cämäğatçelekkä çığarmadı.
2025 yılnıñ ğıynvarında ilbaşı Donald Tramp wazıyfasına kereşkännän birle, Tramp idaräse 35 il belän üz illärennän çitkä, yäğni "öçençe il watandaşlarına" deportatsiyälängän migrantlarnı qabul itü turında kileşü tözede. Bu kileşülärneñ neçkälekläre kübesençä ser itep saqlana.
15 ildäge 26 media oyışmasınnan 72 jurnalisttan torğan konsortsium tarafınnan ütkärelgän tikşerü deportatsiyälängännär, xökümät wäqalätleläre, yuristlar häm êkspertlar belän 100dän artıq intêrvyunı üz êçenä alğan.
Kileşülärgä ireşü öçen tırışlıqlar
Konsortsium äğzası bulğan “The Washington Post” gazetı tarafınnan alınğan Däwlät Departamentı yazmaları AQŞnıñ öçençe illär belän kileşülärgä ireşü öçen, kimendä, 410 million dollar totarğa planlaştıruın kürsätä.
Bu summanıñ 81 million dolları kileşülärgä qul quyğan xökümätlärgä, ä 178 million dollardan artığı Xalıqara migratsiyä oyışmasına häm 123 million dollardan artığı BMOnıñ qaçaqlar agentlığına bülengän.
Tikşerügä qaqılışlı belderüdä Aq Yort öçençe illärgä cibärelgän migrantlar arasında illäre alarnı qabul itüdän baş tartqannar, şulay uq, deportatsiyä turındağı boyırıqları bulsa da, üz illärenä qaytarmasqa sorağannar da bar dip belderde.
18 sentyabrdä AQŞ federal apelliyatsiyä mäxkämäse migrantlarğa tiyeşle xäbärnamä birelmäwen häm deportatsiyä qararına şikayät belderü mömkinlege bulmawın sıltaw itep, öçençe illärgä deportatsiyäläwne tuqtatu turında qarar çıqardı.
