Somalinıñ kön'yağındağı Bay töbägendä terrorçı törkem "Äş-Şäbab"qa qarşı uzdırılğan operatsiyädä, kimendä, 75 suğışçınıñ täêsirsez xälgä kiterelüe, 56sınıñ yaralanuı turında xäbär itelde.

Saqlanu ministrlığınıñ yazmaça belderüenä qarağanda, Somali Milli Armiyäse däwam itüçe “Banooda” operatsiyäse qısalarında Bay töbäge Burxakaba rayonındağı Jameka cirlegendä "Äş-Şäbab"nıñ obyektlarına kiñ külämle höcüm oyıştırğan.

Belderüdä operatsiyäneñ säğatlär buyı däwam itüe häm törle punktlarda bäreleşlär buluı assızıqlana. Qayber çığanaqlarğa kürä, kimendä, 75 oyışma äğzası täêsirsez xälgä kiterelgän, 56sı yaralanğan.

Belderüdä bäreleşlär waqıtında "Äş-Şäbab" äğzalarınıñ şartlatqıç yöklägän maşinalar belän Somali armiyaseneñ xärbi texnikasın nişanğa aluı häm qayber maşinalarnıñ zıyan kürüe xäbär itelä.

Somali armiyäse "Äş-Şäbab"qa qarşı “Banooda” operatsiyasen däwam itteräçäk häm oyışmağa yärdäm kürsätüçelärne dä maqsat itep alaçaq.

Somalidä 2006 yılda barlıqqa kilgän terrorçı törkem "Äş-Şäbab" Somali xökümäte belän xalıqara tınıçlıq köçlärenä qarşı yıllar buyı höcümnär yasap kilä.

Somali iminlek köçläre häm xalıqara xezmättäşlärneñ yärdäme belän 2022 yıldan birle ilneñ üzäk häm kön'yaq töbäklärendä oyışmağa qarşı kiñ külämdä operatsiyalar ütkärelä.