İrannıñ Amerika Quşma Ştatları höcümnäre näticäsendä öç keşeneñ ülüen belderüe häm AQŞnıñ Küväyt, Baxreyn belän Ürdündäge (İordaniyädäge) xärbi qorılmalarına höcümnär oyıştıruı belän Yaqın Könçığıştağı kiyerenkelek cidençe tön rättän arttı.

İran inqilap saqçıları şimbä irtäsendä “aldawçan amerikan küzläw şımçıları” tarafınnan yünältüe äytelgän ike neft tankerınıñ Ormuz buğazında minağa bärelep şartlawın beldergän bulsa, AQŞ ğaskäre isä bu raslawlarnı tiz arada kire qaqtı.

İnqilap saqçıları monnan tış däwlät televideniyäsennän kritik su yulınnan uzarğa tırışqan dürt köymäne “tuqtatuın” belderde.

AQŞ köçläre isä AQŞ Üzäk komandalığınıñ “X”'tä urtaqlaşqan belderüenä kürä, İranğa qarşı höcümnärneñ “İrannıñ xärbi säläten köçsezlätergä däwam itüne” maqsat itüen iğlan itte.

Taraflarnıñ yañadan bäreleşlärne başlatuınnan birle yäşängän iñ zur kiyerenkelektä İran AQŞ köçlären hawa mäydanı, vokzal häm ike küper belän bergä grajdan asqormasın nişan itep aluda gäyepläde häm töbäk külämendäge AQŞ qorılmaların bärüen belderde.

İrannıñ kisätüe

İran dini liderınıñ ölkän xärbi kiñäşçese general-mayor Muhsin Rezai “IRIB”kä yasağan belderüendä AQŞ höcümnäre tağın ike-öç kön däwam itkän oçraqta Tährannıñ “tulı masştablı höcüm operaśiyälären” yañadan başlataçağın äytep: “İran monnan arı üç alu häm qarşılıq kürsätü belän cawap qaytaruda üzen çiklämäyäçäk häm bernindi säyäsi çik qurqınıçsız bulmayaçaq”, - dip iskärtep uzdı.

Suğış 28nçe fevraldä AQŞ-İzrailneñ İranğa qarşı ülemnärgä kitergän höcümnäre belän başladı, İran moña cawap qaytarıp dönyanıñ zur öleşe öçen bik möhim neft taşu kanalı bulğan Ormuz buğazın ğamäli bularaq yabıp quydı.