Törkiyä İlbaşı Räcäp Tayyip Ärdoğan İtaliya xökümäte räise Djordjiya Meloni belän telefon aşa söyläşte. Anda ikeyaqlı mönäsäbätlär, şulay uq, töbäk häm dönyaküläm waqıyğalar qaraldı.

İlbaşınıñ sotsial media akkauntı “X” aşa yasagan belderüenä qarağanda, ilbaşı Ärdoğan söyläşüdä Törkiyäneñ İtaliya belän barlıq ölkälärdä, bigräk tä saqlanu sänäğatendä xezmättäşlekne nığıtu östendä êşläwen belderde häm ikeyaqlı mönäsäbätlärne alğa êtärü öçen yaña adımnar yasawnıñ möhimlegen assızıqladı. Şulay uq, belderüdä İlbaşı Ärdoğannıñ kiläse atnada Änkarada uzacaq NATO liderları sammitınıñ berlektäşlär arasındağı berdämlekne nığıtacağına ömetlänüen äytüe dä bilgeläp ütelä. İtaliya xökümäte räise Meloninıñ da sammitta qatnaşuı kötelä.

32 äğza häm 9 çaqırılğan ildän 52 lider qatnaşında 36nçı NATO däwlät häm xökümät başlıqları sammitı 7-8 iyuldä Änkarada uzacaq.

Mönäsäbätlär tiränäyä

Törkiyä häm İtaliya arasındağı säwdä küläme 2024 yılda 32,2 milliard dollarga citte häm ike il 2025 yılnıñ aprelendä Rimda uzğan sammitta 40 milliard dollarlıq säwdä maqsatın quydı. İtaliya Törkiyäneñ iñ möhim êksport bazarlarınıñ berse bulıp qala, Törkiyäneñ İtaliyağä êksportı 2025 yılda rekordlı 12,4 milliard dollarga citte.

Saqlanu sänäğatendäge bäyläneşlär dä tiränäyä. “Baykar” häm İtaliyanıñ “Leonardo” firması 2025 yılda dron texnologiyälärenä yünältelgän urtaq citeşterü başladı, ä şul uq yılnıñ iyunendä “Baykar” İtaliyanıñ “Piaggio Aerospace” aêrokosmik kompaniyäsen satıp aldı.

İtaliya 2020 yıldan birle Kaspiy gazın İtaliyanıñ könyagına taşıy torğan Trans-Adriatik ütkärgeçen (TAP) üz êçenä aluçı Könyak gaz koridorı aşa Törkiyäneñ töp ênergetika partnerlarınıñ berse bulıp qala. Xäzerge mäğlümatlar buyınça, İtaliyada yaqınça 50 meñ Törkiyä watandaşı yäşi, ä 2025 yılda Törkiyägä yaqınça 740 meñ İtaliya turistı kilgän.