Törkiyä İzrailneñ 1915 yılğı waqıyğalarnı tanu turındağı qararın ğayepläp, älege qararnı fälästinlelärgä qarşı qılğan cinayätlären yäşerüne maqsat itkän säyäsi adım dip bäyäläde.

Törkiyä tışqı êşlär ministrlığınıñ yäkşämbe könge belderüendä bolay diyelä: “Dönya küz aldında Fälästin xalqına qarata sistemalı zolım başqarğan häm BMO Xalıqara mäxkämäsendä Ğazzä xalqına qarşı genośid êşläw ğäyebe belän xökem itelüçe İzrail xökümäte 1915 yılğı waqıyğalarğa qağılışlı qabul itkän säyäsi qararı belän üz cinayätlären yäşerergä omtıla”.

Ministrlıq bu qararnıñ xoquqıy häm tarixi çınbarlıqlarnı iğtibarsız qaldıruın, şulay uq Ğazzädäge fälästinlelärgä qarşı qılınğan cinayätlär belän bäyle räweştä Xalıqara cinayät’ mäxkämäse tarafınnan  qulğa alu  boyırığı çığarılğan Netan’yaxu häm anıñ tarafdarlarına basımnı çağıldıruın belderde.

Törkiyä İzrailneñ töbäktäge êkspansionistik häm totrıqsızlandıruçı säyäsäten tuqtatu öçen êşläwen däwam itäçägen, şulay uq Netan’yaxu xökümäten tınıç xalıqqa qarata, ayıruça Fälästin xalqına qarşı qılınğan cinayätlär öçen cawaplılıqqa tartıluı öçen tırışlıq quyaçağın citkerde.

İke yaq ta zıyan kürgän faciğa

1915 yılğı waqıyğalarnı genośid dip tanuğa qarşı bulğan Törkiyä  alarnı ike yaq ta yuğaltular kiçergän faciğa dip atıy.

Änkara moña qädär dä berniçä tapqır bu mäsäläne tikşerü öçen Törkiyä häm Ärmänstannan tarixçılar, şulay uq xalıqara belgeçlärdän torğan urtaq komissiya tözüne täq’dim itte.

İzrail 2023 yılnıñ oktyabrennän birle Ğazzädä yaqınça 73 meñ fälästinlene üterde, 173 meñnän artıq keşene yaraladı.

 Genośid töbäktäge grajdanlıq infrastrukturasınıñ küp öleşen cimerde, ä gumanitar xäl äle dä bik awır bulıp qala.

Xalıqara cinayät mäxkämäse 2024 yılnıñ 21 noyabrendä Ğazzädä qılınğan suğış cinayätläre häm keşelekkä qarşı cinayätlär säbäple Netan’yaxu häm êlekke saqlanu ministrı Yoav Gallantnı qulğa alu turında boyırıq çığardı.

İzrailneñ şulay uq Fälästingä qarşı alıp barğan suğışı säbäple Xalıqara cinayät’ mäxkämäsendä genośid däğwası däwam itä.