Venesuêla Milli Mäclese (AN) räise Xorxe Rodriges sośial çeltärdäge säxifäsendä yasağan belderüendä cirteträwdä hälaq buluçılar sanınıñ 579 keşegä artıp 6 meñ 125kä citüen, yaralanuçılar sanınıñ isä 16 meñ 740 buluın citkerde.
Venesuêlanıñ waqıtlıça däwlät başlığı Delsi Rodriges başqala Karakasta qatnaşqan toraq tapşıru tantanasında belderülär yasadı.
Yıl azağına qadär 4 meñ ğailägä 4 meñ toraq tapşırılaçağın assızıqlagan Rodriges:
“Dekabrgä qadär tapşırılaçaq bu 4 meñ toraqqa östäp, yaña yortlar tözeleşen başlaw öçen cir kişärleklären tikşerüne däwam itäbez häm mäydannarnı äzerlibez. Monnan tış, bu sanğa yaña proyektlar kertelmägän”, — dide.
Rodriges afättän zıyan kürgännärne yalğız qaldırmayaçaqların belderep:
“Maqsatıbız — cirteträwlardän zur zıyan kürgän watandaşlarıbıznı şatlandıru ,alarğa yalğız tügelleklären xis itterü. Waqıtlıça çatır şähärçeklärendä häm lagerlarda yäşäwçe här keşeneñ üzeneñ yalğız tügel ikänen belüen telibez”, — dip äytte.
Venesuêlada ike zur cirteträw bulğan ide
AQŞ Geologik tikşerenülär üzäge (USGS) 24 iyündä Venesuêlada 39 sekund aralıq belän 7,2 häm 7,5 ball zurlığında ike cirteträw buluın xäbär itkän ide.
Berläşkän Millätlär Oyışmasınıñ Üseş Programması (UNDP) 26 iyündäge belderüendä bu cirteträwlär turıdan-turı kitergän matdi zıyannı 6,7 milliard dollar dip citkergän ide.
