Dönyaküläm tanılğan qırğız yazuçısı Çıñğız Aytmatovnıñ istälegen saqlayaçaq "Aytmatov ğaläme (Aytmatov aalamı)" mädäni-memorial kompleksı anıñ tuğan şähäre Şeker awılında tantanalı räweştä açıldı.
Qırğızstan İlbaşı Sadır Caparov, Talas ölkäseneñ Aytmatov rayonındağı Şeker awılında uzğan tantanada qatnaşıp, Çıñğız Aytmatovnıñ “Qızıl alma” xikäyäsen simvollaştırğan yasalma alma ağaçı aldında çığış yasadı. Bu xikäyä ğailä bäyläneşläreneñ qimmäte, niqaxtağı cawaplılıq häm çın mäxäbbät turında söyli, bu çın mäxäbbät tormışnıñ soñğı êtabında açıla.
Caparov dönyanıñ aldınğı illäre üzläreneñ borınğı tarixların häm milli qimmätlären texnologik alğarış belän berrättän üsterälär häm Çıñğız Aytmatovnıñ tormışı häm icatı alarğa “Yaña Qırğızstan" tözüdä yul kürsätäçäk, dip belderde.
Caparov maqsatlarınıñ Aytmatov mirasın bu bina divarlarında saqlaw ğına tügel, anı kiläse buınnarğa tiränten citkerü buluın da belderde. Ul qırğız xalqınıñ ruxi dönyasında ayırım urın alıp torğan bu proyektnıñ Aytmatovnıñ tuğan ciren genä tügel, böten Qırğızstannı dönyağa tanıtaçaq möhim adım buluın iskärtep uzdı.
Caparov tözeleş başlanğannan soñ küp yıllar däwamında tuqtatılıp torğan "Aytmatov aalamı” proyeltın nihayät tämamlawları belän ğorurlanuların belderde häm êşne tormışqa aşıruğa öleş kertkän härkemgä räxmäten belderde.
1928nçe yılnıñ 12 dekabrendä Talasnıñ Şeker awılında däwlät êşleklese Torekul Aytmatov häm tatar teatrı sänğätçese Näğimä Aytmatova ğailäsendä tuğan yazuçı 2008nçe yılda Rusiyä telekanalı öçen dokumental film töşerü waqıtında Tatarstan başqalası Qazanda awırıp kitä.
2008nçe yılnıñ 10nçı iyünendä Germaniyädä däwalanu waqıtında 79 yäşendä wafat bulğan Aytmatov başqala Bişkäk yanındağı Ata-Beyit milli tarixi-memorial kompleksında ätiseneñ qabere yanına cirlände.
