İrannıñ yuğarı qurqınıçsızlıq organı düşämbe könne Ormuz buğazın idarä itü öçen yaña oyışma tözelüen xäbär itte.

İrannıñ Yuqarı Milli Qurqınıçsızlıq şurası üzeneñ räsmi “X” akkauntında "Farsı qultığı buğazı idaräse (PGSA)" dip atalğan oyışma turında yazdı, anda ul "Ormuz buğazı operatsiyäläre häm soñğı waqıygalar turında real' waqıt rejimında yañalıqlar bireläçäk" dip belderde.

Başta yaña oyışmanıñ närsä êşläyäçäge tögäl bilgele tügel ide, läkin İrannıñ ingliz telendäge “Press TV” kanalı Ormuz buğazı östendä "suverenlıqnı saqlaw sisteması" buluın häm buğaz aşa ütüçe korablarğa info@pgsa.ir adresı aşa "qağıydälär" çibärelüen xäbär itte.

28 fevral'dä AQŞ häm İzrail belän suğış başlanğannan birle İran möhim buğaz aşa diñgez xäräkäten sizelerlek çikläde.

İrannıñ bu su yulı östennän kontrole global' bazarlarnı teträtep, Tähranğa zur yoğıntı yasadı. Moña cawap itep, AQŞ İran portlarına üzeneñ diñgez blokadasın kertte.

Tınıç çorda bu marşrut global' neft' häm sıyıqlandırılğan tabiğıy gaz taşunıñ yaqınça biştän ber öleşen üze aşa ütkärä ide. Annan, şulay uq, aşlamalar kebek başqa möhim tovarlarnı da taşıylar.

Suğış başlanğannan birle, İran buğaz aşa diñgez transportı "suğışqa qadärge statusına" kire qaytmayasağın qat-qat belderde häm uzğan ayda berençe tranzit keremen aluın iğlan itte.