Törkiyä ilbaşı Räcäp Täyyip Ärdoğan suğış cinayätçeläreneñ urını BMO tribunasında tügel, ä mäxkämä zalında buluın belderde häm genośid qılğan keşelärneñ üz ğamälläre öçen cawap birergä tiyeşlegenä basım yasadı.
Şimbä könne İstanbulda uzğan 21нче MÜSİAD EXPO Xalıqara säwdä yärminkäse häm 29 nçı Xalıqara Eş forumnıñ yomğaqlaw çarasında çığış yasağan Ärdoğan: “Suğış cinayätçeläreneñ urını Berläşkän Millätlär Oyışması tribunasında tügel, ä alar qılğan üterülär, qoyğan qan öçen cawap biräçäk mäxkämä zallarında. İnşallah, ul könnär dä, şiksez, kiläçäk”, — dide.
Ärdoğan: “Ägär genośid qılğan keşelär ğadälät, xoquq, tarix aldında cawap birmäsälär, şul uq wäxşilek tağın qabatlanaçaq, şul uq keşelek faciğase belän balalarıbız da oçraşaçaq”, — dip kisätte.
Fälästin xalqına yaqlawın yañartqan Ärdoğan: “Fälästin xalqı yalğız tügel. Ğazzädäge qardäşlärebez xoquq häm ğadellek êzläwdä yalğız tügel”, — dide.
Ärdoğan Netanyaxunıñ çığışı başlanğanda BMO ğomum şurası zalınnan çığıp kitüçelärne xuplawın belderde.
“Keşelek ittifağı wäkile bularaq ğomum şura suğış cinayätçelärenä layıqlı cawap birde”, — dide ul.
İqtisad mäs'äläsenä dä tuqtalğan Ärdoğan Törkiyäneñ soñğı 24 çirek däwamında özleksez üseş kiçerüen häm xäzerge waqıtta dönyada 16 nçı, Awrupada isä 6nçı iñ zur iqtisad buluın äytte.
Ul şulay uq êksport başqaruçı törek firmaları sanı 2002 yılda 33 meñ bulğan bulsa, 2025 yılda alarnıñ 168 meñgä citüen äytte, 20 kön êlek iğlan itelgän yaña Urta möddätle programma belän totrıqlı häm balanslı üseş maqsatlarına turı kiterep qatğıy räweştä alğa baraçaqların belderde.
