Rusiya däwlät başlığı Vladimir Putin Awrupağa höcüm itärgä cıyınmawların belderep: “Ägär Rusiyägä, şul isäptän Kaliningradqa turıdan-turı höcüm bulsa, ilebezdä bulğan barlıq qorallarnı qullanu mäs'äläse qotılğısız räweştä häm tiz arada kön tärtibenä kiläçäk”, – dide.

Vladimir Putin Mäskäw şähärendä uzdırılğan Xalıqara Valday diskussiya klubınıñ yıllıq utırışında Rusiya  belän Awrupa illäre arasındağı kiyerenkelek häm Ukrainadağı suğış turında fikeren belderde.

Rusiya tışqı êşlär ministrlığınıñ Kaliningradqa qağılışlı belderüen  häm qayber illärgä cibärgän xatlarındağı süzlärne xuplawın äytkän Putin: “Ägär Rusiyägä, şul isäptän Kaliningradqa turıdan-turı höcüm bulsa, ilebezdä bulğan barlıq qorallarnı qullanu mäs'äläse qotılğısız räweştä häm tiz arada kön tärtibenä kiläçäk”, – dip belderde.

Putin ber genä ilgä dä yanamawların assızıqlap: “Bez berkemne dä qurqıtmıybız. Rusiya tışqı êşlär ministrlığınıñ belderüe häm qayber illärgä cibärelgän xatlar qurqıtu tügel, ä bezne qurqıtırğa tırışuçılarğa cawap”,– dide.

Vladimir Putin berkemgä dä höcüm itärgä cıyınmawların tağın ber qat assızıqlap: “Bez monı 2029 yılğa da, 2030 yılğa da, 2050 yılğa da planlaştırmıybız. Läkin höcümgä duçar bulsaq, cawap birergä turı kiläçäk.  Awrupa illäre watandaşları monı açıq añlarğa, bezneñ totışıbız belän üz illärendäge qayber säyäsi citäkçelärneñ totışın ayırırğa tiyeş”, – dip äytte.

Rusiya qarşında Rusiya xalqınnan ike tapqır kübräk  häm zur iqtisadi, xärbi mömkinleklärgä iyä yaq toruın añlatqan Putin, bu yanawğa qarşı qullarındağı köç häm çaralarnıñ çiklängän buluın, şunıñ öçen östenleklären qullanırğa mäcbür bulaçaqların belderde.

Vladimir Putin: “Bügen Rusiyädä başqa berkemdä dä bulmağan qoral bar. Bu – bezneñ östenlegebez”, – dide.