Pänceşämbe könne Rusiya häm Ukraina räsmi zatları Mäskäw belän Kiyev citäkçelekläreneñ ber-bersenä ut açuın, şähärlärgä häm asqormağa yünälgän höcümnär oyıştıruları turında xäbär itte.
Çernigov gubernatorı Vyaçeslav Çaus pänceşämbe könne yasağan belderüendä Ukrainanıñ tönyağında urnaşqan Priluki şähärenä Rusiyä raketasınıñ oçırtıluın, höcümdä 22 keşeneñ ülüen, şular arasında 5 balanıñ buluın häm 50 dän artıq keşeneñ yaralanuın äytte.
“Prilukida 22 keşe ülde. Alar arasında 5 bala da bar. Dürt keşe höcüm urınında, ber bala isä xastaxanädä wafat buldı,” — dip yazdı Çaus Telegram-kanalda.
Ukraina ilbaşı Volodimir Zelenskiy beldergänçä Rusiyädä yasalğan “Kh‑101” raketası Prilukidağı toraq yortqa tigän. Ukraina liderı östämä hawa saqlanu sistemaları häm xärbi kiräk-yaraqlar belän täêmin itü çaqıruın qabatladı.
Rusiyada Ukraina dron höcümnäre turında xäbärlär
Rusiyä räsmiläre Krasnodar töbägendäge kön’yaq port şähäre Novorossiyskka oyıştırılğan dron höcümendä 4 keşeneñ ülüen, alar arasında ber balanıñ buluın, 29 keşeneñ yaralanuın belderde. Töbäk gubernatorı Veniamin Kondrat’yev citkergänçä yaralanuçılardan öçese awır xäldä.
Rusiyä saqlanu ministrlığı hawa saqlanu sistemalarınıñ 11 töbäktä, Qara diñgez östendä häm Rusiyä tarafınnan yawlap alınğan Qırımda 596 Ukraina dronın bärep töşerüen açıqladı.
"Yandex" mäğlümatlarnı êşkärtü üzägendä yanğın çıqqan
“TASS” däwlät xäbär agentlığı beldergänçä Ryazan töbägendäge Sasovo şähärendä urnaşqan häm Rusiyäneñ texnologiyä şirkäte “Yandex” tarafınnan êşlätelgän mäğlümatlarnı êşkärtü üzägendä dron höcüme arqasında yanğın çıqqan.
“Yandex” äytüençä höcümdä asqormağa öleşçä zıyan kilgän, şul säbäple üzäktäge êşlär tuqtap qalğan häm qayber xezmätlär waqıtlıça tuqtarğa mömkin. Şirkät waqiğada yaralanuçılarnıñ bulmawın citkerde.
