Törkiyä tışqı êşlär ministrı Xaqan Fidan Süriyä tışqı êşlär ministrı Äsäd Xäsän Şäybani belän urtaq matbuğat oçraşuı ütkärde.
Fidan bolay dide:
"Başqarğan êşlärebez näticäsendä Süriyäneñ könnän-kön totrıqlıraq däwlätkä äwerelüen häm illärebez arasındağı xezmättäşlekneñ tiränäyä baruın daimi räweştä küzätäbez. Bu xäl töbägebezneñ häm däwlätlärebezneñ kiläçäge öçen dä bezgä, Allağa şöker, zur ömet birä”.
"Bezneñ urtaq kiläçägebez bar"
Fidan bolay dip däwam itte:
"Süriyädäge uñay üzgäreşlär urtaq tırışlıqlarıbıznıñ näticäse buldı. Monı monnan alda da berniçä tapqır assızıqlap äytkän idek: Törkiyä belän Süriyäneñ tınıçlığı häm totrıqlılığın ber-bersennän ayırıp qarap bulmıy. Bezne 900 çaqrımnan artıq ozınlığındağı çik kenä tügel, ä urtaq tarix, urtaq mädäniyät häm urtaq kiläçäk bäyli”.
"Süriyä belän mönäsäbätlärebezne üsteräbez"
Ministr Fidan bolay dip belderde:
"Süriyä belän iqtisadi mönäsäbätlärebezne dä yaña çornıñ ixtıyaclarına turı kilä torğan räweştä üsteräbez. Däwlät oyışmalarıbız häm şäxsi tarmaq Süriyäne yañadan torğızuğa, ênergetika infrastrukturasın üsterügä häm transport sistemasın yañartuğa öleş kertü öçen dä êşli. Regional’ proyektlar da möhim rol uynayaçaq dip uylıybız. Monıñ konkret ürnäge bularaq Törkiyä, Süriyä, Yordaniya häm Soğud Ğaräbstanı arasında başlatqan avtoyul häm timer yulları bäyläneşe iniśiativasın kürsätergä bula”.
