Tışqı êşlär ministrı Xaqan Fidan Kiyevqa yasağan häm ikeyaqlı mönäsäbätlär, säwdä belän regional iminlekkä yünälgän “bik näticäle” säfärennän soñ däwam itüçe suğışqa qaramastan Törkiyä belän Ukrainanıñ strategik urtaqlıqlarınıñ nığuın belderde.
Comğa könne “X" platformasınnan urtaqlaşqan belderüendä Fidan Ukraina İlbaşı Volodimir Zelenskiy, Däwlät başlığı ofisı räise Budanov häm Tışqı êşlär ministrı Sibiha belän ütkärelgän söyläşülär waqıtında ikeyaqlı mönäsäbätlär belän berrättän Rusiyä-Ukraina suğışındağı soñğı xällärneñ kiñqırlı itep tikşerelüen iskärtep uzdı.
Fidan yazmasında: “Suğış şartlarına qaramastan illärebez arasındağı xezmättäşlekneñ tağın da artuına bez bik şatbız”, - dip äytte.
Säfäre aldınnan Ukraina parlamentınıñ Törkiyä-Ukraina irekle säwdä kileşüen raslawın qänäğätlelek belän qarşılawın belderüçe Fidan monıñ êşxanälär öçen yaña forsatlar tudıraçaq häm ikeyaqlı iqtisadi mönäsäbätlärne möhim däräcädä alğa alıp baraçaq möhim borılış noqtası buluına basım yasadı.
Törkiyä tınıçlıqnı yaqlawın tağın ber qat rasladı
Säfäre waqıtında Fidan, Ukrainanıñ bäysezlegenä, möstäqillegenä häm cir bötenlegenä qarata Törkiyäneñ yaqlawın tağın ber qat raslap: “Törkiyä bularaq taraflarnı söyläşülär östälenä qaytaraçaq häm daimi tınıçlıqqa öleş kertäçäk härtörle iniśiativanı yaqlarğa äzerbez“, - dide.
Fidan monnan tış qırım tatarlarınıñ milli liderı Mostafa Abdulcämil Qırımoğlu häm Qırım tatar mäclese başlığı Refat Cubarov belän qırım tatarları cämğiyäteneñ wazğiyäten söyläşü öçen oçraşuın, qırım tatarlarınıñ xoquqların saqlawnıñ häm mädäni üzañnarınıñ yäşätelüeneñ Törkiyä öçen härwaqıt östenlek, prioritet buluın bilgeläp uzdı.
Säfäre mönäsäbäte belän İlbaşı Zelenskiy tarafınnan büläklängän ordennı aluı belän ğorurlanuın citkerüçe ministr Fidan Ukraina citäkçelegenä räxmätlären belderde.
Fidan üzeneñ yazmasın: “Törkiyä Ukraina belän nigezle duslığın häm strategik urtaqlığın İlbaşıbız bilgelägän vizion qısalarında, üzara ışanıç häm urtaq mänfäğätlär nigezendä nığıtırğa däwam itäçäk”, - süzläre belän tögälläde.
