Törkiyäneñ dron şirkäte “Baykar” ilneñ iñ zur saqlanu häm aviaśiä çarası bulğan “SAHA 2026” yärminkäsendä ber-ber artlı möhim kileşülär tözi. Şulardan berse — İtaliä firması “Gruppo Esea” belän keşesez hawa apparatları öçen tulı avtomatlaştırılğan citeşterü liniyasen qoru turındağı kileşü.
5-9 may könnärendä İstanbuldağı “Expo Center”da uzuçı “SAHA 2026” Törkiyä häm Awrupanıñ iñ zur saqlanu, aviaśiä häm ğäläm sänäğäte klasterı tarafınnan oyıştırıldı.
“Baykar” häm “Gruppo Esea” arasındağı bu kileşü Törkiyä saqlanu sänäğäte şirkäteneñ citeşterü quätlären arttıru häm qamilläşterelgän xalıqara texnologiyalärne üz dron flotına kertü tırışlıqlarınıñ ber öleşe bulıp tora.
Çarada çığış yasağan “Baykar”nıñ yuğarı däräcäle citäkçese Haluk Bayraktar bu xezmättäşlekneñ ähämiäten bolay bäyäläde: “Bu partnyerlık “Baykar”ğa zurraq külämdäge avtomatik seriyle citeşterüne tağın da arzan bäyägä häm standartlaştırılğan räweştä başqarırğa mömkinlek biräçäk.”
Strategik borılış noqtası
“Gruppo Esea”nıñ yuğarı däräcäle citäkçese Alessandro Liberatore bu kileşüneñ Törkiyä häm İtaliä arasındağı üsep kilüçe sänäğät xezmättäşlegendä strategik borılış noqtası buluın belderde.
“Baykar” şirkäte “SAHA - 2026” qısalarındağı çaralarda, keşesez hawa apparatları flotınıñ bäru quäten arttıru maqsatınnan Berläşkän Ğäräp Ämirlekläre firması “EDGE Group” belän dä kileşü imzaladı.
Bu kileşü “Al Tariq” dip atalğan yuğarı tögällektäge idarä itelä torğan snaryadlarnıñ “Baykar”nıñ “Bayraktar Akıncı” keşesez suğış hawa apparatına integraśiyalänüen küzdä tota.
Törkiyä dron citeşterüçese, şunıñ belän bergä, Franśiäneñ “Safran Electronics and Defence” firması belän dä kileşü imzaladı. Bu kileşüneñ töp yünäleşläre: aldınğı aviaśiya êlekstronikası häm êlektron çişeleşlär ölkäsendä strategik xezmättäşlek öçen qısa buldıru.
