Meteorologiya räsmiläre belderüençä, dawıl Çjeśzyan provinśiyäsendäge Yuyxuan’ şähärenä berençe tapqır kilep citkändä tizlege säğätenä 150 çaqrım bulğan. Tayfun yaqınça ber säğättän soñ ikençe tapqır Vên’çjou şähärenä kilgän.

Dawıl böten töbäktä transportnı tuqtatqan. Şanxayda ğına da 1400 oçqıç säfäre ğamäldän çığarılğan.

Qıtay räsmi zatları aldanraq Yunıs tayfunı arqasında iñ yuğarı däräcä bulğan qızıl töstäge qurqınıç turında citkergän läkin düşämbe irtäsendä dawılnıñ däräcäse tropik dawılğa qadär kimetelgän.

Dawıl ilneñ êçke yaqlarına taba xäräkät itä. Räsmilär, çärşämbe könenä qadär köçle yawım-töşem, su basu häm cir şuışuı qurqınıçı däwam itüe turında kisätte.

Düşämbe könne Şan’dun, Xênan’, Xubêy, An’xoy, Śzyansu häm Çjeśzyan provinśiyaläre belän Şanxay şähäre öçen köçle yañğırlar buluı farazlandı.

Cirle citäkçeleklär xalıqqa açıq bulğan urınnardağı çaralardan yıraq torırğa çaqırdı.

Çjeśzyannıñ provinśiya başqalasındağı wäqalätle organnar dawıl häm su basulardan qaçuçı maşina yörtüçeläre öçen park tüläwlären beterde.

Provinśiyaneñ başqa töbäklärendä isä räsmi zatlar yaqınça 900 meñ keşene imin urınnarğa küçerde häm aşığıç xällärdä qullanıluçı meñnän artıq sıyınu urının açtı. Tayçjou şähärendä isä yaqınça 390 meñ keşe öylärenän êvakuaśiyalände.

Qıtay däwlät televideniyese “CCTV” xäbärenä qarağanda dawıl cirgä kilep citkänçe 6 meñ çaqrım yul uzğan. Bu xäl dawılnıñ normal tayfunnan öç tapqırğa ozın ğomerle buluın kürsätte.

“CCTV” kanalı şulay uq dawılnıñ kiñ täêsir ölkäsenä iyä häm yawım-töşem däräcäse yuğarı buluın belderde.

Dawıl belän bäyle yalğan mäğlümätlärne internet arqılı taratqan ike keşe qulğa alındı.

Yunıs tayfunı Qıtayğa kilep citkänçe Filippin, Tayvannıñ tönyaq öleşläre häm Yaponiyanıñ Okinava utrawında köçle yawım-töşemnärgä säbäpçe buldı.