Rusiya däwlät başlığı Vladimir Putin 9 mayda Ukrainadağı suğışnıñ tämamlanuı turındağı süzläreneñ  Rusiyäneñ suğış qırındağı alğarışın analizlawğa nigezlänüen äytte.

Läkin Putin suğışnıñ qayçan tämamlanaçağı turında töğäl waqıt  birmäde häm comğa könne yasağan belderüendä Könbatışnıñ Rusiya Awrupa belän suğışqa äzerlänä digän däğwalarınıñ  yalğan buluın belderde.

Putin şulay uq Könbatış matbuğat çaralarınıñ Rusiya kontrolendäge Luganskta studentlar tulay torağına Ukrainanıñ  dron höcüme turındağı xäbärlärennän oyalırğa tiyeşlegen äytte, bu  höcüm näticäsendä 21 keşe hälaq buldı.

Ukraina däwlät başlığı Zelenskiy Rusiyäneñ Ukrainağa yaña häm zur külämle höcümgä äzerlänüen citkerde.

Ul üzeneñ videomöräcäğatendä bolay dide:

“Bezdä Rusiyäneñ yaña häm kiñ qolaçlı höcümgä äzerlänüe turında küzläw mäğlümatları bar. Büleklärbez tiz räweştä cawap qaytara häm äzer xäldä. Hawa köçläre häm kükne saqlawçı başqa köçlär ğadättägeçä täwlek buyı wazıyfa başqaraçaq”.

Rusiya düşämbe könne Kiyevtäge ob’yektlarğa sistemalı höcümnär başlaw niyäten beldergän, çit il watandaşların, şulay uq diplomatlarnı ildän kitärgä çaqırğan ide.